Хоразм вилояти ИИБ ходими ўз жонига суиқасд қилди
Хоразм вилояти Янгиариқ туманида ИИБ ходими ўз жонига қасд қилди. Бу ҳақда вилоят прокуратураси матбуот хизмати хабар берди.
Қайд этилишича, Янгиариқ туман ИИБ ходими У.Р. 26 ноябрь куни туман ИИБ биносида хизмат қуроли орқали ўз жонига қасд қилган. Дастлабки маълумотларга кўра, У.Р.нинг ўз жонига қасд қилишига оилавий келишмовчилик оқибатида келиб чиққан руҳий сиқилиш сабаб бўлган.
Ҳолат юзасидан Янгиариқ туман прокуратураси томонидан терговга қадар текширув ҳаракатлари олиб борилмоқда. «Текширув вилоят прокуратураси томонидан назоратга олинган», — дейилади муносабатда.
Аввалроқ Фарғонада ваҳшийларча ўлдирилгани айтилган аёл ўз жонига қасд қилгани маълум бўлгани, Андижонда қурилиш компанияси раҳбари ўз жонига қасд қилгани тўғрисида хабар берилганди.
