НАТО бош котиби Украинада тинчликни таъминлашнинг «ягона йўли» ҳақида гапирди
НАТО Украинада узоқ муддатли тинчликни таъминлашнинг ягона йўли унга мунтазам қурол етказиб бериш деб ҳисоблайди. Бу ҳақда альянс бош котиби Йенс Столтенберг маълум қилди.
«Қанчалик ажабланарли бўлмасин, Украинада узоқ муддатли тинчликни таъминлашнинг ягона йўли Киевга ҳарбий қурол-яроқларни етказиб беришни давом эттиришдир. НАТО Украинада тинчликка Россия ғалаба қозона олмасагина эришиш мумкин деб ҳисоблайди», — дейди Столтенберг.
Унинг сўзларига кўра, айни вақтда альянсга аъзо давлатлар Киевга «Патриот» ҳаво ҳужумидан мудофаа тизимларини бериш имкониятини кўриб чиқмоқда.
Шунингдек, Столтенберг НАТО Украинанинг альянсга қўшилиш истагини тан олишини, бироқ айни дамда унинг асосий устувор масаласи мамлакат «ўзини ҳимоя қилиш ва энергетика инфратузилмасини тиклаши учун шошилинч ёрдам» кўрсатиш эканини маълум қилган.
Аввалроқ Зеленский Украинани қайта тиклашга қанча маблағ кераклигини маълум қилгани, Рим папаси Россиянинг Украинага қарши урушини «даҳшатли геноцид»га қиёслагани, АҚШ Украина бюджетини қўллаб-қувватлашга яна 4,5 млрд доллар ажратиши тўғрисида хабар берилганди.
