Ўзбекистонда сўнгги кунларда коронавирус билан чалинганлар сони ортиб бормоқда: биргина 29 ноябрь куни 141 кишида коронавирус аниқланди. Вируснинг қайси штамми кенг тарқалмоқ? Асоратлар қандай бўлади? Шу каби саволларга Санитария эпидемиологик осойишталик ва жамоат саломатлиги хизмати бошлиғи ўринбосари Нурмат Отабеков жавоб берди.

«Сўнгги 1 ҳафта 10 кун ичида бутун дунё бўйлаб вирус авж олиб бормоқда. Маълумотларга кўра, асосан омикрон штамми тарқалмоқда. Шунингдек, омикрондан бошқа штамм касаллик чақирмаяпти деган фикрлар ҳам бор.

Худди шундай Ўзбекистон шароитида ҳам касаллик бир мунча кўтарилган. Сўнгги 7 кунни оладиган бўлсак, сал кам 500 нафар беморни шифохонага ётқиздик ҳамда 350 нафарга яқин беморни шифохонадан чиқардик», — дейди Отабеков.

Унинг қайд этишича, Ўзбекистонда ҳам асосан омикрон штамми кенг тарқалмоқда. У мамлакатга кириб келганида асосан ёши катталарда аниқлан бўлса, эндиликда қатлам танламаяпти.

«Бизни безовта қилаётгани шифохоналарга ҳам ўткир респиратор вируси, ҳам коронавирусга чалинган беморлар мурожаат қилмоқда. Қачонки микс инфекция — 2 та юқумли касаллик қўзғатувчиси бир пайтда организмга юқадиган бўлса, унинг асоратлари ҳам жиддийроқ бўлиши мумкин», — дейди Санитария эпидемиологик осойишталик ва жамоат саломатлиги хизмати бошлиғи ўринбосари.

Аввалроқ Ўзбекистонда коронавирус билан касалланганлар сони яна ошишни бошлагани, шунингдек, хурмо организмга коронавирус билан курашишда ёрдам бериши аниқлангани ҳақида хабар берилганди.