Тошкентда «Ипак йўлида туризм» Тошкент халқаро туризм ярмаркаси бошлангани тўғрисида хабар берилганди. Таниқли тадбиркор Анвар Абдуқаюм «Туризмда халқаро рақобат ва брендинг» мавзусидаги сессияда Ўзбекистон палов бренди ҳақида гапирди.

Тадбиркорнинг сўзларига кўра, туристларни жалб қилиш учун аввало халқаро брендга айланиш керак.

«Биз биринчи навбатда бошқа халқларда бўлмаган ва фақат бизда бўлган ўзига хос, рақобатбардош соҳаларга эътибор қаратишимиз керак. Бунга битта мисол — ўзбек палови. Ҳозир дунёда қанча одам ўзбек паловини билади? Тўғрисини айтганда, бизнинг паловимизни Эронники деб ўйлайдиганлар бор. Улар паловни биз билан боғламайди. Бунинг учун нима қилиш керак? Бутун дунё бўйлаб минглаб ош марказларини очиш керак. Очганда ҳам шунчаки оддий дўкон ёки кафе ҳолатида эмас, балки миллийлигимиз рамзларини ишлатишимиз лозим. Биз шу гастрономия орқали бутун дунёга Ўзбекистонни танитишимиз мумкин», — дейди Анвар Абдуқаюм.

Унинг айтишича, бу орқали бир марта эмас, ҳар куни, ҳар ҳафта энг камида ҳар ой Ўзбекистонни танитиш имкониятига эга бўлинади. Телевизорда Travel to Uzbekistan деган 1 миллион долларлик реклама қўйишимиз мумкин, лекин уни икки-уч мартадан кейин одамлар кўрмайди, чарчайди…

«Гастрономияни ривожлантириш учун овқатни ривожлантириш керак. Нимага Вьетнамга боргимиз келмайди? Ҳаммада хавф пайдо бўлади: бир ҳафта нима ейман деган савол. Нимага турк ошхонаси деса, бутун дунё яхши кўради? Чунки хитойлик, вьетнамлик, америкалик еса ҳам қорни оғримайди, ким еса ҳам унга сал бўлса-да ёқади.

Худди шундай: дунёда ягона овқат бор, қорни оғриётган одамни ҳам тузатиб юборади — бу ўзбек миллий палови. Чунки ҳар куни есангиз ҳам касал бўлмайсиз, тўймайсиз. Кунига икки-уч маҳал бўлса ҳам ейилаверади. Бизнинг паловда гуруч бор, гуруч осиёликлар овқати, лекин ичида сабзи, пиёз, гўшт кўплиги учун европаликлар ҳам овқатига кириб кетаверади. Бундан ташқари, норин деган таомимиз ҳам бор, бу овқат бошқа ҳеч қаерда йўқ», — дея таъкидлайди тадбиркор.