Россия Украина ғарбидаги Луцк ва Львов шаҳарларини эгаллаш орқали уни Ғарб ёрдамидан узиб қўймоқчилиги маълум қилинди. Бу ҳақда «Новая газета» хабар берди.

«Новая Газета»га кўра, Россия ҳарбий қўмондонлиги Беларусда қўшин тўпламоқда ва Украина чегарасини Ғарбнинг қурол-яроғ етказиб беришидан узиш учун Луцк ва Львовни тезкор зарба билан қўлга олишни режалаштирмоқда. Бунга параллель равишда Бахмут йўналишида яна бир зарба режалаштирилган. Уларнинг режаларига кўра, президент Владимир Зеленскийни таслим бўлишга мажбур қилиш Россия қуролли кучларининг муваффақиятли ютуғи сифатида қаралмоқда.

Беларуснинг Гродно шаҳридаги рус ҳарбий хизматчиларидан бирининг журналистларга берган интервьюсида:

«Айрим қисмларда барча материаллар ва жиҳозлар русларга топширилди. Беларуслар озиқ-овқат ва таъминотни таъминлайди. Дала лагерлари очилмоқда», — дея маълумот берган.

Таъкидланишича, жорий режаларга кўра, декабрь ойининг ўрталарига келиб Беларусдаги рус қўшинлари сафарбар қилинади ва гуруҳнинг умумий сони 300 мингдан ошади.

«Айтишларича, ҳужум декабрга режалаштирилган, Бу вақтда ҳаво совийди ва тупроқ ҳам ниҳоят музлайди», — дея тушунтирган нашр манбаси. «Бунга параллель равишда Бахмут орқали Славянск ва Краматорскка ўтиш режалаштирилган».

Таъкидланишича, Россия ҳарбийлари доимий равишда разведка ишларини олиб боришмоқда ва Украинанинг чегара ҳудуди кўп километр ичкаригача миналангани, шунингдек, йўлларнинг аксарияти вайрон бўлганини билишади.

Россия ҳарбий хизматчисининг сўзларига кўра, миналар ва артиллерия ўқлари остида ботқоқлар ва ўрмонлар орқали узоқ муддатли ҳужумга қарор қилиш ўз жонига қасд қилиш билан тенг.

У «Биз бир вақтнинг ўзида минглаб одамларни қўямиз. Чегара бўйлаб жиддий истеҳкомлар қурилган, кенглиги уч метр бўлган танкга қарши хандақлар қазилган. Барча йўналишлар Украина артиллерияси томонидан ўққа тутилмоқда», — дея маълум қилган ва белоруслар томонидан кучайтирилган рус гуруҳи Киевга ҳам, Ковелга ҳам етиб бора олмаслигини қўшимча қилган.

«Путин бу режани яна бир блицкриг сифатида аниқ талқин қилмоқда», — дея хулоса қилган журналистга интервью берган ҳарбий.

Шу билан бирга, тасвирланган режа Беларусь мудофаа вазири Виктор Хрениннинг баёнотлари билан бир қаторда, у бошқа куни Шарқий Европада АҚШ ва НАТО қўшинларининг мисли кўрилмаган даражада кўпайишини таъкидлаган ва Ғарб аллақачон Россия ва Беларусни тўғридан-тўғри душман деб билишини айтиб ўтган.

Эслатиб ўтамиз, аввалроқ Россия қўшинларига Херсондан чекиниш буюрилганди. Шундан сўнг Херсонни Днепрнинг нариги соҳили билан боғловчи Антонов кўпригига бир нечта зарбалар берилган. Украинанинг бир қатор шаҳарларига ва энергетика тизимига ракета зарбалари уюштирилган. Украина президенти Россия Украинага қарши 4,7 мингдан ортиқ ракета учирганини маълум қилган.