Ўзбекистонда 1 декабрдан ҳайдовчиларнинг қоидабузарлиги учун жарима баллари бериш тизими ишга тушгани тўғрисида хабар берилганди. ИИВ ЖХД ЙҲХББ бошлиғи Олим Саидовнинг маълум қилишича, жарима баллари 12 баллдан ошиб кетса, ҳайдовчилик гувоҳномаси маълум муддатга маҳрум қилинади.

Қайд этилишича, 2022 йил 1 декабрдан бошлаб ҳайдовчилар томонидан содир этилган қоидабузарликлар жарима баллари билан баҳоланиши белгиланган. Ҳисобланган жарима баллари 12 баллдан ошган ҳолларда ҳайдовчи маълум муддатга транспорт воситасини бошқариш ҳуқуқидан ўрнатилган тартибда маҳрум қилинади.

«Жарима балларини қўллаш тизими халқаро тажрибада кенг фойдаланилаётган, ҳозирги вақтда ишлаб турган тизимлардан бири ҳисобланади. Мазкур тизим 1 декабрдан тест режимида ишга тушди. Лекин айрим техник камчиликлар сабабли тўлақонли ишга туширмаяпмиз. Чунки бу халқга ноқулайлик яратиш керак эмас. Ҳар бир қоидабузарлик бўйича адолатли қарор қабул қилиниши керак. Барча камчиликлар бартараф этилгач, тизим тўлақонли ишга тушади ва балларни ҳисоблаш бошланади», — дейди Олим Саидов.

Унинг қайд этишича, агар ҳайдовчининг жарима баллари 12 баллдан ошиб кетса, у ҳолда бу ҳайдовчи ҳайдовчилик гувоҳномасидан 3 йилга маҳрум қилинади.

Аввалроқ Ўзбекистонда молиявий назоратга оид қоидабузарликлар ҳақида хабар берганларга мукофот тўланиши, Тошкентда қоидабузарликни қайд этадиган янги радар синовдан ўтказилаётгани тўғрисида хабар берилганди.