Шавкат Мирзиёев 9 декабрь куни Қирғизистонга ташриф буюради. Бу ҳақда Қирғизистон ташқи ишлар вазири ўринбосари Айбек Артикбаевнинг Қирғизистон халқаро ишлар, мудофаа, хавфсизлик ва миграция қўмитаси йиғилишидаги нутқига таяниб, «Репорт» ахборот агентлиги хабар берди.

Қайд этилшича, ташриф давомида Ўзбекистон раҳбари Қирғизистон ҳукумати билан бир қатор ҳужжатларни имзолайди. Хусусан, ташриф давомида икки мамлакат президентлари Кампиробод сув омборини биргаликда бошқариш бўйича ратификация варақаларини алмашади.

Икки мамлакат раҳбарияти, шунингдек, Қирғизистон ва Ўзбекистон фуқаролари ўртасида чегараларни кесиб ўтишни соддалаштириш тўғрисидаги ҳужжатни имзолайди. Бундан ташқари, 9 декабрь куни Бишкекда Евроосиё Иқтисодий Иттифоқининг саммити бўлиб ўтади. Унда Ўзбекистон кузатувчи мақомига эга.

Эслатиб ўтамиз, аввалроқ икки мамлакат ташқи ишлар вазирлари Кампиробод сув омборини биргаликда бошқариш бўйича битим имзолаганди. Ўзбекистон Олий Мажлис Сенати ушбу сув омбори тўғрисидаги келишувни маъқуллагани, шунингдек, Қирғизистон билан чегара ва Кампиробод сув омборига оид келишувларни имозлагани ҳақида хабар берилган.