Президент Администрациясида 2022 йил якуни билан ижтимоий-иқтисодий ривожлантиришда кутилаётган натижалар ва энергетикадаги вазият бўйича йиғилиш ўтказилмоқда. Бу ҳақда ЎзА хабар берди.

Президент Администрацияси раҳбари Сардор Умурзақов раислигида бўлиб ўтаётган йиғилишда куз-қиш мавсумига тайёргарлик ишларидаги қолоқликлар ҳамда юзага келган вазиятни бартараф этиш чоралар тезкор қабул қилинмагани ва умуман сустлиги танқид қилинди.

«Аҳоли ва иқтисодиёт тармоқларини энергия ресурслари билан мутаносиб таъминлаш масалаларини тезкор ва тизимли ҳал этиб бориш мақсадида Энергетика вазирлиги, Иқтисодий тараққиёт ва камбағалликни қисқартириш вазирлиги, Инвестициялар ва ташқи савдо вазирлигида куну тун ишлайдиган штаблар ташкил этиш топширилди», — дейилади хабарда.

Қайд этилишича, ушбу масалалар бўйича кунлик назорат ўрнатиш учун Президент маслаҳатчилари ва Бош вазир ўринбосарлари ҳар бир вилоят ҳокимига бириктириладиган бўлди.

Шунингдек, давлат ташкилотлари машиналарига вақтинча газ қуйиш тақиқланди. Бундан ташқари, Аи-80 бензини учун акциз солиғи бекор қилинди. Шу билан бирга, йиғилишда юзага келган вазиятни нормаллаштириш бўйича аниқ чора-тадбирлар кўриб чиқилди. Жумладан:

• товар газ етказиб бериш ҳажмини суткасига 5 миллион куб метрга ошириш;
  2023 йил 1 мартга қадар давлат идоралари тасарруфидаги сиқилган газда ҳаракатланадиган автомобиллардан фойдаланишни тақиқлаш, уларни бензинга ўтказиш;
• хорижий давлатлар билан қўшимча табиий газ, электр энергияси, кўмир, мазут харид қилиш бўйича музокараларни жадаллаштириш;
• 2 ой муддатга Аи-80 бензини импорти учун акциз солиғи ва уни чакана сотиш учун акциз солиғини ҳисоблаш ва ундиришни тўхтатиб туриш;
• биржа сотувларига қўйилаётган Аи-80 бензининг кунлик ҳажмини ошириш;
• Аи-80 бензини нархининг асоссиз оширилишига йўл қўймаслик, нарх ошиши бошланғич нархнинг 5 фоизидан ортиқ бўлмаслигини таъминлаш.

Аввалроқ Тошкентдаги газ қуйиш шохобчалари вақтинча ёпилиши, шунингдек, Фарғона водийсидаги газ «заправка»лар иши тўхтатилгани ҳақида хабар берилганди.