Олий Мажлис Қонунчилик палатаси депутати Расул Кушербаев фуқароларни электр таъминоти ҳақида муаммолар ҳақида гапирласлик учун қамоқ билан «огоҳлантириган» депутат ҳақида фикр билдирди.

Музаффар Жамолитдинов исмли наманганлик депутат Facebook’даги саҳифасига газ, электр билан боғлиқ муаммоларни олиб чиқаётганларни қамоқ билан «огоҳлантирганди». Ҳозирда ушбу пост ўчириб ташланган.

«Ижтимоий тармоқга газ, свет йўқлигидан нолиётганларни шахсини суриштириб кўринг, бирортаси қамалиб чиққан одам эмас. Яъни қамалиб, озодликдан маҳрум бўлганлар озодлик, эркинлик ва тинчликни қадрига шу даражада кўп етадики, газ, свет муаммоси аҳамиятсиз бўлиб қолади… Шамда ўтирсанг ҳам уйингда ўтир, ИИБни камерасида эмас», — деб ёзган депутат.

Расул Кушербаевнинг ёзишича, фуқароларни энергия таъминотидаги муаммолар ҳақида гапиртирмаслик, тинчликни қадрига етиш учун учун уларга қамоқ билан таҳдид қилиш демократик жамиятга хос бўлмаган услуб.

«Ачинарлиси, бундай баёнотларнинг халқ сайлаган (сайлаган бўлса) халқ вакилларидан чиқиши ҳеч бир қолипга сиғмайди. Бу каби дунёқарашга эга билим ва савияси паст, сайловчилар манфаатини ҳимоя қилмайдиган шахсларнинг депутат мақомига эришиб қолаётгани аслида энг катта фожиамиздир», — дейди Кушербаев.

Аввалроқ Расул Кушербаев Ўзбекистондаги метан «заправка»ларда кузатилаётган навбатлар ҳақида фикр билдирганди. «Вазиятни шу даражага олиб келган, газ конларимизни сув текинга бериб юбориб, ўзлари виллаларда дам олиб юрганлар унутмасин: ҳар бир юртдошимиз чекаётган азияти учун вақти келиб улар, албатта, жавоб беришади», — деб ёзганди депутат.

Эслатиб ўтамиз, Тошкентдаги газ қуйиш шохобчалари вақтинча ёпилган. Аввалроқ Фарғона водийсидаги газ қуйиш шохобчаларининг иш вақти қисқартирилгани, Ўзбекистонда газдан қарздор иссиқхоналар олти ойгача пеня тўламаслиги тўғрисида хабар берилганди.