Россия АҚШ Сенати қўмитасининг Украинадаги геноцид борасидаги резолюциясига муносабат билдирди
Россиянинг АҚШдаги элчихонаси Сенатнинг Хорижий ишлар бўйича қўмитасини Украинадаги геноцид бўйича резолюциясини рад этди.
Қайд этилишича, дипломатик ваколатхона ҳужжатда келтирилган айбловни «фактларни тўғридан-тўғри бузиш», деб атаган. Элчихонадагиларнинг таъкидлашича, Капитолий аллақачон Россияга қарши ташаббусларни босиб чиқариш билан шуғулланувчи конвейерга айланиб бўлган.
Ҳужжат билан Россия «Украина халқига қарши геноцид актларини содир этгани учун» қораланган, АҚШ ва унинг иттифоқчилари Украина ҳукуматини қўллаб-қувватлашга чақирилган, шунингдек, АҚШ президенти Жо Байденга «Магнитский акти» доирасида геноцидга алоқадор инсонларга қарши санкциялар жорий этиш таклиф қилинган.
Мавзуга доир: Politico Зеленскийни Европадаги «энг нуфузли инсон», Путинни эса «йил омадсизи» деб атади
Аввалроқ Рим папаси Франциск Россиянинг Украинага қарши урушини 1930 йиллардаги «даҳшатли геноцид»га қиёслаган, Жо Байден Россиянинг Украинадаги ҳаракатларини геноцид деб атаган, НАТО бош котиби Украинада тинчликни таъминлашнинг «ягона йўли» ҳақида гапирган эди.
