АҚШ президенти Жо Байден инсониятни олдинда яна бир пандемия кутиб турганини маълум қилди, деб хабар беради «РИА Новости».

Қайд этилишича, АҚШ—Африка саммитидаги чиқиши давомида Байден Африка давлатлари етакчилари билан ҳамкорликнинг долзарб масалаларини муҳокама қилди.

«Биз COVID-19’га барҳам беришга ҳаракат қилар эканмиз, соғлиқни сақлаш тизимлари ва муассасаларини мустаҳкамлашда давом этамиз ва соғлиқни сақлаш муаммоларига, шу жумладан, кейинги пандемияга қарши туришга тайёр бўлиш учун умумий тиббий қамровга ҳаракат қиламиз. У эса шубҳасиз содир бўлади», — дейди АҚШ етакчиси.

Шунингдек, Байден ОИТС ва безгакка қарши курашда Америка—Африка ҳамкорлигини қайд этган.

«Ўнлаб йиллардан буён ОИТС ва безгакка қарши курашиш бўйича президент дастури, шунингдек, соғлиқни сақлаш бўйича бошқа халқаро дастурлар доирасда ҳамкорлик қилдик, инсонлар ҳаётини қутқаришга ва кловидга… COVID-19’га қарши курашда ёрдам бердик», — деган АҚШ президенти.

Бу 80 ёшни қаршилаётган Жо Байденнинг биринчи марта адашиб кетиши эмас. Апрель бошида у АҚШнинг собиқ президенти Барак Обаманинг рафиқаси Мишелни вице-президент бўлган деб юборганди. Аслида эса бу лавозимда унинг ўзи ўтирган. Бундан ташқари Байден бир неча бор Харрисни президент деган.

Аввалроқ ЖССТ коронавирусга қарши қўлланадиган икки доридан воз кечишни тавсия қилгани, АҚШ олимлари ортиқча вазнлиларда коронавирусдан ўлим хавфи 10 баравар юқори эканини аниқлагани, Хитойда норозилик намойишларидан кейин коронавирус чекловлари юмшатилгани тўғрисида хабар берилганди.