Бухорода яширинча ишқий муносабатда бўлган аёлни қўрқитиш йўли билан товламачилик қилмоқчи бўлган эркак ушланди. Бу ҳақда Бухоро вилояти ИИБ ахборот хизмати хабар берди.

Қайд этилишича, Бухоро тумани «Шейхонча» маҳалласида яшовчи 45 ёшли шахс 2019 йилнинг ёзида Бухоро шаҳрида 41 ёшли аёл билан танишиб, у билан ишқий муносабатларини видеотасвирга олган. Эркак ушбу видеони аёлнинг турмуш ўртоғига кўрсатмаслик учун 500 доллар талаб қилган.

Бухоро вилояти ҳуқуқ-тартибот органлари томонидан ўтказилган тезкор тадбир давомида у талаб қилган пулларини олаётган вақтида ашёвий далиллар билан ушланган.

Ҳолат юзасидан Жиноят кодексининг 165-моддаси (товламачилик) 1-моддаси билан жиноят иши қўзғатилган. Ҳозирда дастлабки тергов ҳаракатлари олиб борилмоқда.

Аввалроқ Андижонда эркакни кийимсиз ҳолда видеога олиб, товламачилик қилган гуруҳ ушлангани, Тошкентда Telegram’да аёл номидан профиль очиб, товламачилик қилган йигит қўлга олингани, Бухорода ўзгани «қаматиб юбориш» билан қўрқитиб, пул талаб қилган 72 ёшли эркак ушлангани тўғрисида хабар берилганди.