Европада Франция—Марокаш ўйинидан кейин тартибсизликлар бошланди — видео
Европа шаҳарларида Жаҳон чемпионатининг ярим финали доирасида ўтказилган Франция—Марокаш (2:0) ўйинидан кейин тартибсизликлар бошланди.
Қайд этилишича, финал ҳуштаги чалиниши билан ижтимоий тармоқларда Париж, Ланс, Амстерда ва бошқа шаҳарлардаги тартибсизликлар видеолари пайдо бўла бошлаган.
Бундай ҳолатларнинг энг катталари Авинён ва Ницца, шунингдек, Брюсселда кузатилган. Бельгия пойтахтида истиқомат қилувчи фуқаролардан бири марокашликлар тош отгани туфайли балконидаги Франция байроғини олиб қўйишга мажбур бўлган.
Франциянинг Монпелье шаҳри марказида тартибсизликларни бошлаган футбол ишқибозларини тарқатиш учун полиция кўзни ёшлантирувчи газдан фойдаланган.
Футбол ишқибозлари ўртасидаги тўқнашувлар ўйиндан олдин бошланганди. Иккала терма жамоа мухлислари Comedie марказий майдонида пиротехникадан фойдаланган, ҳолатга полициянинг махсус бўлинмалари аралашган.
14 декабрь куни ўйин бошланишидан олдин Франция ички ишлар вазири Жеральд Дарманен жамоат тартибини сақлашга 10 мингга яқин полициячи жалб этилгани, уларнинг 2,2 минг нафар Парижда эканини маълум қилганди.
Мавзуга доир: Францияда ЖЧ–2022 учрашувларидан кейин юз берган тартибсизликларда 170 дан ортиқ одам қўлга олинди
Аввалроқ Бельгияда терма жамоа мағлубиятидан сўнг футбол мухлислари тартибсизликлар уюштиргани тўғрисида хабар берилганди.
