GD Power-Powerchina консорциуми Наманган вилоятида 150 МВт қувватга эга лойиҳа бўйича ғолиб деб топилгани тўғрисида хабар берилганди. Энергетика вазирлигининг маълум қилишича, ушбу қуёш фотоэлектр станцияси учун берилган таклиф қайта кўриб чиқилади.

Қайд этилишича, Наманган вилоятида 150 МВт қувватли лойиҳа учун GD Power-Powerchina консорциуми (Хитой) компанияси томонидан ишлаб чиқарилган бир киловатт-соат электр энергиясини 4,828 АҚШ центида етказиб бериш таклифи қиммат ҳисобланади.

Шу муносабат билан Энергетика вазирлиги ушбу таклифни жуда қиммат деб ҳисоблайди ва ушбу лойиҳа бўйича тарифни оптималлаштириш юзасидан қўшимча музокаралар ўтказилишини маълум қилган.

«Шуни алоҳида таъкидлаш керакки, мазкур лойиҳани амалга оширишда электр энергияси тарифини камайтириш чоралари кўрилади ва станциянинг қурилишида хавфсизлик томонларига алоҳида эътибор берилади. Ушбу лойиҳа бўйича ўтказиладиган музокаралар натижаси юзасидан қўшимча маълумот берилади», дейилади хабарда.

Аввалроқ Вазирлар Маҳкамаси биносида қуёш фотоэлектр станцияси ишга туширилгани, Шавкат Мирзиёев Навоийда йирик қуёш фотоэлектр станциясини ишга туширгани тўғрисида хабар берилганди.