Ўзбекистон вакили Руслан Нурудинов оғир атлетика бўйича Колумбияда ўтказилган Жаҳон чемпионатида учта олтин медални қўлга киритди. Бу ҳақда Миллий олимпия қўмитаси матбуот хизмати хабар берди.

Қайд этилишича, Руслан Нурудинов дунё биринчилигида -109 килограмм вазн тоифасида мутлақ жаҳон чемпионлигини қўлга киритган. Бу билан Нурудинов икки бор жаҳон чемпионлигига эришган биринчи ўзбек оғир атлетикачисига айланган.

Нурудинов даст кўтариш машқида 177 килограмм, силтаб кўтаришда 220 килограмм ва умумий ҳисобда 397 килограмм билан ушбу вазн тоифасида тенгсиз эканини кўрсатиб, 3 йўналишда олтин медалларга эгалик қилган. Бу унинг фаолиятида дунё биринчилигидаги иккинчи чемпионлик. Ўзбекистонлик спортчи энг яқин таъқибчисини 8 килограммга ортда қолдиришга эришган.

Оғир атлетика бўйича Жаҳон чемпионадида эркаклар, -109 килограмм:

• Руслан Нурудинов (Ўзбекистон) — 397 (177+220) килограмм;
• Гиорги Чхеидзе (Грузия) — 389 (170+219) килограмм;
• Рафаэл Кастилё (Колумбия) — 388 (174+214) килограмм.

Аввалроқ Баҳодир Жалолов америкалик рақибини 4-раундда нокаутга учратиб, ғалаба қозонгани, Саудия шаҳзодаси Аргентина устидан қозонилган ғалаба учун футболчиларга Rolls-Royce совға қилгани тўғрисида хабар берилганди.