ЖЧ-2022. Хорватия ва Марокаш ўртасидаги 3-ўрин учун баҳс ўз ниҳоясига етди
Футбол бўйича Қатарда давом этаётган жаҳон чемпионатида учинчи ўрин учун баҳс ўз ниҳоясига етди.
Khalifa International Stadium стадионида Хорватия ва Марокаш терма жамоалари иштирокида бўлиб ўтган баҳсда Европа қитъаси вакилларининг қўли баланд келди ҳамда жаҳон чемпионатининг бронза медалларига эга чиқишди. Учрашувда хорватлар томонидан киритилган голларга Йошко Гвардиол ва Мислав Оршич муаллифлик қилган бўлса, Африка қитъаси вакилларининг ягона голига Ашраф Дари муаллифлик қилди.
Шу тариқа Хорватия терма жамоаси Марокашни 2:1 ҳисобида мағлубиятга учратиб жаҳон чемпионатининг учинчи ўрин соҳибига айланди. Кўплаб футбол мухлисларининг меҳрини қозонган Марокаш терма жамоаси эса уйига қуруқ қўл билан қайтадиган бўлди.
Чемпионатнинг финал баҳси эса 18 декабрь куни Тошкент вақти билан соат 20:00 да старт олади. Мундиал чемпионлиги учун Франция ва Аргентина терма жамоалари ўзаро куч синашади.
