Тошкент шаҳар ИИББ ходимлари уйдан сейфни ўғирлаганликда гумонланувчи шахсларни қўлга олдилар. Бу ҳақда пойтахт ИИББ ахборот хизмати хабар берди.

Қайд этилишича, 2022 йилнинг декабрь ойида Шайхантоҳур тумани ИИО ФМБга 41 ёшли Феруза Н. уйидан пул ва заргарлик буюмлари йўқолганлиги ҳақида ариза билан мурожаат қилган.

Кўрилган чора-тадбирлар натижасида, ушбу жиноятни содир этишда гумон қилинган, 32 ёшли Махбуба А. ва 34 ёшли Матлуба К. аниқланиб, қўлга олиндилар. Улар уй эгаларининг йўқлигидан фойдаланиб, уй хоналаридан бирининг эшигини калит танлаш йўли билан очиб, ичида 7 000 АҚШ доллари ва жами 90 000 АҚШ долларлик тилла тақинчоқлари бўлган сейфни ўғирлаб кетишганлиги аниқланган.

Мазкур ҳолат юзасидан Ўзбекистон Республикаси Жиноят кодексининг 169-моддаси («Ўғрилик») билан жиноят иши қўзғатилиб, тергов ҳаракатлари олиб борилмоқда.

Аввалроқ Тошкентда меҳмонхона сейфидан пул ўғирлаган икки эркак ушлангани ҳақида хабар берилганди.