Наманганда Қирғизистон фуқароси 1 килога яқин героин билан қўлга тушди — видео
Давлат хавфсизлик хизматининг Фарғона вилояти бўйича бошқармаси ходимлари томонидан олиб борилган тезкор-қидирув тадбирлари натижасида оғир турдаги гиёҳвандлик воситасининг ноқонуний айланмасига чек қўйилди.
Хусусан, Тошкент—Андижон йўналишида ҳаракатланаётган Nexia-2 русумли автомашина Наманган вилоятининг Поп туманидаги «Шеробод» йўл-патруль хизмати масканида тўхтатилган.
Автомашина холислар иштирокида кўздан кечирилганда, унда йўловчи сифатида кетаётган, Андижон шаҳрида вақтинча яшовчи, 1973 йилда туғилган Қирғизистон фуқаросига тегишли 996 грамм героин моддаси борлиги аниқланиб, процессуал тартибда расмийлаштириб олинди.
Аниқланишича, тожикистонлик наркокуръерлар томонидан контрабанда йўли билан Тошкент вилоятининг Бекобод тумани ҳудудига ўтказиб берилган ушбу гиёҳвандлик моддасини мазкур шахс Фарғона водийсида сотишни режалаштирган.
Ҳозирда унга нисбатан ДХХ Фарғона вилояти бўйича бошқармаси томонидан Жиноят кодексининг тегишли моддалари билан жиноят иши қўзғатилган.
Мавзуга доир: Қозоғистонда гиёҳванд моддаларни сотиш ва сақлашда гумонланган ўзбекистонлик ушланди — фото
Аввалроқ ДХХ кучли таъсир қилувчи дори воситаларининг ноқонуний савдосига чек қўйгани, Самарқандда 5 килограмга яқин гиёҳванд моддалар айланмаси тўхтатиб қолингани тўғрисида хабар берилганди.
