Кечиктирилган авиарейслар, «свет»сиз қолган 100 минглаб аҳоли, 30 га яқин қурбон: АҚШга қор бўронлари ёпирилди
АҚШнинг турли штатларига ёпирилган қор бўронлари туфайли юзага келган ноқулай об-ҳаво оқибатида 28 киши ҳалок бўлди, деб хабар беради NBC News.
Фото: Getty Images
Ўлим ҳолатлари Оклахома, Кентукки, Миссури, Теннесси, Висконсин, Канзас, Небраска, Огайо, Нью-Йорк, Колорадо ва Мичиганда қайд этилган.
АҚШ ва Канадани қамраб олган «Эллиотт» қишки шторми 21 декабрь куни бошланган. Мамлакат Миллий метеорология хизматининг маълум қилишича, бундай табиат ҳодисалари камдан-кам ҳолларда учрайди. Шторм Канада яниқдаги Буюк кўллар ҳудудидан Мексика чегарасидаги Рио-Гранде дарёсига қадар чўзилган. Ҳаво ҳароратининг кескин тушиб кетиши оқибатида йўл ҳаракати ҳодисалари ҳам ортган. Бундан ташқари, электр тармоқларига ҳам шикаст етган. 24 декабрь куни АҚШда 8 мингга яқин авиарейс кечиктирилган, яна 3 мингтаси бекор қилинган.
Фото: Reuters
Фото: EPA
АҚШнинг шимоли-шарқидаги бир қанча штатларнинг 200 минг аҳолиси электр энергиясисиз қолмоқда, уларнинг қарийб 100 минги Мэн штатида жойлашган.
Фото: Reuters
Нью-Йорк ва АҚШ шимоли-шарқига хизмат кўрсатувчи иккита коммунал компания истеъмолчиларни элекетр энергиясини тежашга чақирган. Техасда ҳароратнинг кескин тушиб кетиши туфайли АҚШ Энергетика вазирлиги фавқулодда ҳолат эълон қилган.
Шунингдек, қишки шторм сабаб АҚШда газ қазиб чиқариш тушиб кетган. 23 декабрь куни қазиб олиш ҳажми газ қувурлари музлаб қолгани учун бир кун олдинги ҳолат бўйича 10 фоизга қисқарган. Bloomberg’га кўра, бу АҚШда газ қазиб олишнинг бир суткалик камайиши бўйича энг йирик ҳодиса ҳисобланади.
Фото: AP Photo
Фото: Getty Images
