Украина энергетика тизимига 1,5 млрд долларлик ёрдам кўрсатилади
Украинанинг халқаро шериклари мамлакат энерготизими учун қарийб 1,5 миллиард долларлик ёрдам кўрсатади. Бу ҳақда Украина бош вазири Денис Шмигаль маълум қилди.
«Шерикларимиздан энергия сектори учун ёрдамлар жадаллашмоқда. Салкам 1,5 миллиард доллар миқдорида ёрдам кўрсатилиши маълум. Ҳар куни зарар етган инфратузилмани таъмирлашга қўшимча ускуналар етиб келмоқда», — деб ёзади Шмигаль Facebook’даги саҳифасига.
Шунингдек, унинг сўзларига кўра, Украинага ҳозирга қадар 200 дан ортиқ энергетика секторига мўлжалланган ускуналар олиб келинган.
Аввалроқ Норвегия энергетика тизимини тиклаш учун Украинага 100 миллион доллар ажратиши, The Time журнали Владимир Зеленскийни «Йил одами» деб эълон қилгани, Зеленский Учинчи жаҳон урушини бошлашга уринишда айблангани, Зеленский урушни тўхтатишнинг 10 та шартини маълум қилгани тўғрисида хабар берилганди.
Мавзуга доир: «Украина ҳеч қачон таслим бўлмайди. Биз ғалаба қозонамиз». Зеленский АҚШ Конгрессида чиқиш қилди
Эслатиб ўтамиз, октябрь ўрталарида АҚШ Украинага ҳарбий ёрдам сифатида 725 миллион доллар ажратиши, Украина мудофаа вазири Германияни мамлакатга қурол етказиб беришни блоклашда айблагани, Бельгия Украинага қурол сотиб олиш учун яна 500 миллион eвро бериши маълум қилинганди. Бир неча кун олдин эса Германия Украинага ҳарбий ёрдамни 2 млрд еврогача ошириши айтилган эди. Ноябрь бошларида АҚШ Украинага 400 миллион долларлик янги ҳарбий ёрдам пакети доирасида 45 та Т-72 танкини етказиб бериши маълум бўлганди.
