Янги ўқув йили учун 1-синфга қабул бошланди
Бу ўқув йилида 730 мингдан ортиқ биринчи синф ўқувчилари мактабга боради
Бугун, 20 июн куни мактабларда биринчи синфга қабул қилиш жараёни бошланди. Янги ўқув йилида 730 мингдан ортиқ бола биринчи синфга қабул қилинади. Бу ҳақда Мактабгача ва мактаб таълими вазирлиги матбуот хизмати хабар берди.
Соат 12:00 дан бошлаб 43 та туман-шаҳарда яшовчи болаларнинг ота-оналари my.maktab.uz электрон платформаси орқали рўйхатдан ўтишлари мумкин. Бошқа вилоятларда қабул мактабларнинг ўзида олиб борилмоқда.
Қабул 2 босқичда олиб борилади:
- 20 июндан 31 июлгача мактаблар бириктирилган микро-ҳудудлар доирасида;
- 1 августдан 15 августгача микро-ҳудудлардан ташқарида амалга оширилади.
2023-2024 ўқув йилида 730 мингдан ортиқ бола биринчи синфга қабул қилиниши режалаштирилган.
Маълумот ўрнида, «Таълим тўғрисида»ги қонунга мувофиқ болалар 7 ёшга тўлганида мактабга қабул қилинади. Яъни бу йил 2016 йил 1 январдан 31 декабргача туғилган болалар биринчи синф ўқувчиси бўлади.
