НАТО бош котиби Йенс Столтенберг Ғарб давлатларини Украинада узоқ давом этадиган урушга тайёргарлик кўришга чақирди. Бу ҳақда у BBC’га берган интервьюсида маълум қилган.

«Биз узоқ йўлга тайёр бўлишимиз керак, пайқаганингиздек Россия ўзининг асосий — Украина устидан назорат ўрнатиш мақсадида воз кечиш ниятида эмас», — дейди Столтенберг.

Унинг таъкидлашича, Украина армиясининг муваффақияти Киевнинг тез орада ғалаба қозониши борасидаги ёлғон ҳиссиётларни пайдо қилмаслиги керак. НАТО бош котибининг ҳисоблашича, Россия қўшинлари урушни давом эттиришга ва янги ҳужумни уюштиришга тайёрланмоқда. Хусусан, Россияда эълон қилинган сафарбарлик бундан далолат бермоқда.

Столтенбергнинг қайд этилишича, бундай вазиятда Украина Ғарбнинг ҳарбий қўллаб-қувватловига жуда муҳтож. У иттифоқчиларни Киевга ёрдам беришни давом эттиришга ва узоқ муддатли режалар тузишга чақирган.

«Аксарият урушлар тинчлик музокаралари билан якунланади. Бу урушда ҳам афтидан шундай боларди. Аммо биз Украина учун тинчликка эришиш шартлари тўлиқ жанг майдонидаги кучлар мувозанатига боғлиқлигини ҳам биламиз», — дейди Столтенберг.

Аввалроқ Зеленский Украинани қайта тиклашга қанча маблағ кераклигини маълум қилгани, Рим папаси Россиянинг Украинага қарши урушини «даҳшатли геноцид»га қиёслагани, АҚШ Украина бюджетини қўллаб-қувватлашга яна 4,5 млрд доллар ажратиши тўғрисида хабар берилганди.