Петербургда Янги йил кечаси 2 мингга яқин муҳожир қўлга олинди
Янги йил кечаси Петербургдаги Сарой майдонида полиция 2 мингга яқин муҳожирни қўлга олди, деб хабар беради «Интерфакс».
Қайд этилишича, муҳожирлар «профилактика мақсадида» ушланган. Рейд натижасида полиция миграция қонунчилиги бузилишларини аниқлаган. Идора қўлга олинганларнинг қанчасида бундай муаммолар борлигига аниқлик киритмаган.
Россия ИИВ Нева чорраҳаси томонидан Сарой майдони томон ўтилаётган йўл ёпилганига изоҳ берган. Полициянинг тушунтиришича, «вақтинчалик чеклов чоралари» тиқилинчларнинг олдини олиш учун кўрилган.
Маҳаллий ОАВлар Моксва ва Петербург марказларида кўплаб фуқаролар қўлга олинганини ёзмоқда. Ҳуқуқ-тартибот органлари ходимларининг кўп бўлишига қарамай, Янги йил кечаси байрам нишонлаган, лезгинкага тушган айрим фуқаролар қўлга олинган.
Петербург ФВБнинг маълум қилишича, шаҳарда Янги йил кечаси нисбатан тинч ўтган. Пиротехника воситаларининг қўлланилиши оқибатида саккиз киши жароҳат олган бир нечта ёнғин юзага келган холос.
Мавзуга доир: Россияда ўзбекистонлик мигрантлар ноқонуний курьерлик ортидан қамалаётгани айтилди — видео
Аввалроқ Миграция агентлиги Россияда ишлаётган ўзбекистонликларни Украинадаги ҳарбий ҳаракатларда қатнашмасликка чақирганди. Кейинроқ Путиннинг қисман сафарбарлик ҳақидаги қарори эълон қилинганидан сўнг агентлик яна бир бор ҳарбий ҳаракатларда қатнашмаслик ҳақида огоҳлантирган. Шунингдек, агентлик ўзбекистонликларни Россиядаги оммавий намойишларда қатнашмасликка чақирган.
