Россияга парвоз қилаётган Uzbekistan Airways самолётида носозлик юзага келди
Ўзбекистондан Россияга учган самолётда носозлик кузатилди. Бу ҳақда «Новости Ташкентского Неба» Telegram каналида хабар берилди.
Хабарда келтирилишича, Uzbekistan Airways’нинг «Тошкент-Қозон» йўналишида учган UK32012 рақамли Airbus A-320 самолёти 7 январь куни соат 19:40 да Россиянинг Самара вилояти ҳаво ҳудудида учаётганида двигателда носозлик юзага келган ҳамда 2700 фут баландликда учишга рухсат сўраган.
Натижада Қозон аэродромида тревога эълон қилинган ҳамда самолёт шу куни соат 19:57 да Қозон аэропортига муваффақиятли қўндирилган.
Аввалроқ Москва—Бухоро йўналишида учган самолёт Навоийга фавқулодда қўнгангани, Тошкентдан Дубайга учган самолёт ортга қайтишга мажбур бўлгани, Кувайтдан учган самолёт Ислом Каримов номидаги Тошкент халқаро аэропортига қўнгани тўғрисида хабар берилганди. Шунингдек, Тошкентдан Олмаотага учган самолёт уюрмага тушиб қолгани ҳақида хабар берилганди.
