Хитой ҳукумати 2020 йилдан бери амалда бўлган бир қатор карантин чекловларини бекор қилди. Хусусан, 8 январдан бошлаб саёҳатчилар Хитойга келганидан кейин беш кунлик карантинга кириши шарт эмас. Бу ҳақда Bloomberg хабар берди.

Маълум қилинишича, Хитой ҳукумати мамлакатга келувчи чет эллик шахслар учун 8 январдан бошлаб мажбурий карантин ва ПЦР тестларини бекор қилди. Шунингдек, Хитойга келишдан олдин сўнгги 48 соат ичида ўтказилган фақат битта ковид тестининг натижалари талаб қилинади.

Хитой ва Гонконг ўртасидаги қуруқлик ва денгиз йўналишларида йўловчиларга хизмат кўрсатиш ҳам тикланди, аммо йўловчилар сонига чекловлар ва салбий тестдан ўтиш талаблари қўйилади.

Шунингдек, 2022 йилнинг куз фаслида Хитой раҳбарияти томонидан олиб борилаётган Covid-19 сиёсатига нисбатан мамлакатда оммавий норозилик намойишлари бошланди. Ушбу норозилик Хитой расмийларининг Соғлиқни сақлаш соҳасидаги сиёсатини нисбатан эркинлаштиришга олиб келди. Натижада декабрь ойи бошида мамлакат раҳбарияти санитария чекловлари сезиларли даражада қисқартирилганини эълон қилди.

Эслатиб ўтамиз, аввалроқ Хитойга келувчилар учун карантин талаби бекор қилингани, Тошкентда коронавирус билан касалланганлар сони кескин ортгани, Хитойда норозилик намойишларидан кейин коронавирус чекловлари юмшатилгани, Хитой провинциясида бир кунда 1 миллиондан ортиқ одамда коронавирус аниқлангани ва Ўзбекистонда коронавирус билан кунлик касалланганлар сони 160 кишидан ошгани ҳақида хабар берилганди.

Мавзуга доир: Хитойда коронавирус оқибатида ўлим ҳолатлари ортиб кетди