Россия президенти Владимир Путиннинг матбуот котиби Дмитрий Песков иккинчи сафарбарлик тўлқини эълон қилиниши мумкинлиги ҳақидаги гап-сўзларга изоҳ берди.

Песков Telegram каналларда сафарбарликнинг иккинчи тўлқини тўғрисида тарқалаётган постларга жиддий эътибор бермасликка чақирган.

«Telegram каналларга жиддий эътибор бериш керак эмас. Бирламчи манба Россия президенти раҳбарлигидаги расмий ҳукумат ҳисобланади. Бундай каналларни бўрттириб кўрсатиш шарт эмас», — деган Песков.

Владимир Путин ҳозирга қадар «қисман сафарбарлик»нинг тугагани тўғрисидаги қарорни имзоламаган, шундай экан, у расман якунланмаган. Сафарбарлик тугагани ҳақида 2022 йил 31 октябрь куни Россия Мудофаа вазирлиги маълум қилганди.

Украина ҳарбий разведкаси Россия ҳукумати 2022 йил октабрда сафарбарликка жалб этилган 300 минг ҳарбийга қўшимча равишда яна 500 минг кишини армияга жалб этиш ниятида эканини маълум қилганди.

Эслатиб ўтамиз, Россия президенти Владимир Путин 21 сентябрь куни мамлакатда қисман ҳарбий сафарбарлик эълон қилган эди. Шундан сўнг Россия фонд бозори кескин қулаган. Сергей Шойгу сафарбарликка асосан кимлар чақирилишига ойдинлик киритганди. Сафарбарлик эълон қилиниши фонида мамлакатни оммавий тарк этишлар ортиб кетган ва бунинг оқибатида қатор шаҳарларга авиарейслар учун чипталар тугаб қолганди.

Россия чегараларида давлатдан чиқиб кетаётган фуқароларнинг узун тирбандликлари юзага келганди. Қисқа вақтда мамлакатни 260 минг эркак тарк этганди. Forbes эса Россияни сафарбарлик бошланганидан бери 600-700 минг киши тарк этгани ҳақида ёзган. Сафарбарликнинг «иккинчи тўлқини» бошланиши ҳақидаги гаплар тарқаганидан сўнг Дмитрий Медведов буни рад этган. Путин эса октябрь ойининг ўрталарида сафарбарлик тахминан 2 ҳафтада тугашини эълон қилган. Аввалроқ Москвада сафарбарлик ниҳоясига етганди.