Самарқанд аэропортида пневматик қуролни олиб киришга уринган шахс тўхтатиб қолинди
Самарқанд вилоятидаги чегара-божхона пости орқали Ўзбекистон ҳудудига қурол олиб кирилишига чек қўйилди. Жиноят ишлари бўйича суд қарорига кўра, у 1,5 млн сўм миқдорида жаримага тортилган, қурол ва унинг ўқлари йўқ қилинган
Самарқанд вилоятидаги чегара-божхона пости орқали Ўзбекистон ҳудудига қурол олиб кирилишига чек қўйилди. Бу ҳақда вилоят Божхона бошқармаси матбуот хизмати хабар берди.
Қайд этилишича, Самарқанд аэропорти чегара божхона пости ходимлари Шереметьево—Самарқанд йўналишидаги авиарейс билан учиб келиб, «яшил йўлак» орқали ҳаракатланган фуқаро Р.Ҳ.нинг хатти-ҳаракатидан шубҳаланган.
Холислар иштирокида Р.Ҳ.га тегишли чамадон белгиланган тартибда кўздан кечирилганда, қиймати 5 миллион сўмлик 1 дона калибрли 4,5 миллиметр бўлган пневматик тўппонча ҳамда ушбу тўппончага тегишли 4 дона сиқилган ҳаво балончаси ва 89 дона ўқни тегишли рухсатномаларсиз олиб киришга урингани фош бўлган.
Мазкур ҳолат юзасидан Жиноят ишлари бўйича суд қарори билан Жиноят кодексининг тегишли моддаларига мувофиқ, судланувчи Р.Ҳ.га базавий ҳисоблаш миқдорининг 5 баравари миқдорида (1,5 миллион сўм) жарима жазоси тайинланган.
Шунингдек, ҳуқуқбузарлик ашёси сифатида олинган пневматик тўппонча, унинг балонча ва ўқлари тегишли тартибда йўқ қилинган.
Аввалроқ Ўзбекистон ҳудудига пневматик қурол олиб ўтилишига чек қўйилгани, Тошкентда ҳайдовчи пневматик қурол олиб юргани аниқлангани, Тошкентда масжидга пневматик қурол билан келган эркак ушлангани тўғрисида хабар берилганди.
