Энергетика вазири бошчилигидаги ишчи гуруҳ (прокуратура ва ички ишлар органлари ходимлари билан ҳамкорликда) табиий газдан ноқонуний фойдаланиш ҳолатларининг олдини олиш бўйича жойларда назорат тадбирлари ўтказди. Бу ҳақда Энергетика вазирлиги матбуот хизмати хабар берди.

Хусусан, 10 январь куни соат 02:10 ларда ишчи гуруҳ томонидан Тошкент вилояти Оҳангарон тумани, «Ўзар» МФЙда жойлашган «Барҳаёт плюс» МЧЖга қарашли автомобилларга газ тўлдириш компрессор шохобчаси (АГТКШ) белгиланган ўчириш графигига риоя этмаган ҳолда фаолият кўрсатаётгани аниқланган.

Шунингдек, ушбу ҳудудда жойлашган «Метан транс сервис» МЧЖ ҳамда «Барҳаёт плюс» МЧЖга қарашли АГТКШларнинг газ ҳисоблагичлари белгиланган тартибга зид равишда ўрнатилгани маълум бўлган.

Мазкур шохобчаларнинг газ ҳисоблаш ускуналари экспертизадан ўтказилганда, ушбу ускуналар фойдаланишга яроқсиз деб топилган ва охирги назорат кунидан бугунги кунга қадар қайта ҳисоб-китоб қилинган. Натижада ушби ташкилотлар томонидан 300 миллион сўмдан (жами 600 миллион сўм) қўшимча табиий газ ҳисобланган.

Шу билан бирга, «Барҳаёт плус» МЧЖда 31 миллион сўм ҳамда «Метан транс сервис» МЧЖда 80 миллион сўм (жами 111 миллион сўм) электр энергияси учун қарздорлиги аниқланган. Мазкур газ тўлдириш компрессор шохобчалар табиий газ тармоғидан узилган.

Декабрь бошидан Тошкентдаги газ қуйиш шохобчалари вақтинча ёпилган. Об-ҳаво ҳарорати кескин пасайгани сабабли шаҳрнинг айрим ҳудудларида газ ва иссиқлик таъминотида узилишлар кузатилмоқда — коммунал хизматлар мавжуд газ заҳирасини барча истеъмолчилар орасида тенг тақсимлашга уринишига қарамай, ресурслар етишмаяпти.

Ўзбекистон энергетика вазири Жўрабек Мирзамаҳмудов энергия таъминотдаги узилишлар юзасидан изоҳ берганди. Унинг сўзларига кўра, ҳозирги об-ҳаво шароити жиддийроқ талафотларнинг олдини олиш мақсадида режали чекловлар ўрнатишни тақозо этмоқда.