Тошкент шаҳрининг «Янгиҳаёт» блокмасканида бир бош Европа кийигини (Дама дама) олиб кетаётган транспорт воситаси тўхтатиб қолинди. Бу ҳақда Табиат ресурслари вазирлиги матбуот хизмати хабар берди.

Қайд этилишича, 10 январь куни Табиат ресурслари вазирлиги, Ички ишлар вазирлиги ва Тошкент вилояти Миллий гвардия ходимлари томонидан фуқаро Х.Ж. ўз автотранспорт воситасида бир бош Европа кийигини тегишли ҳужжатларсиз олиб кетаётгани аниқланган.

Суриштирув давомида Европа кийигининг эгаси эканини важ қилган фуқаро Б.Л. ва унинг шериги бўлган Х.Ж. воқеа жойида тегишли ҳужжатларни тақдим эта олмаган. Шу сабабли ушбу ҳолатга аниқлик киритилгунга қадар Европа кийиги вақтинчалик сақлаш учун Тошкент ҳайвонот боғига топширилган.

Маълумотларга кўра, мазкур тур CITES конвенциясининг I иловасига киритилган. CITES’нинг I иловаси йўқолиб кетиш хавфи остида бўлган ҳайвонлар ва ўсимликлар турларини ўз ичига қамраб олади. Ушбу турларни тижорат мақсадида экспорт, реэкспорт ва импорт қилиш тақиқланади. I иловадаги намуналарни чет элга олиб чиқиш учун CITES’нинг ҳам экспорт, ҳам импорт рухсати олиниши талаб этилади.

Аввалроқ Давлат экология қўмитаси ва ички ишлар ходимлари ҳамкорлигида ўтказилган тезкор тадбир давомида 7 дона итолғи (Falco cherrug) қушларининг ноқонуний савдосига чек қўйилганди. Шунингдек, Наманган вилояти Экология бошқармаси назорат инспекцияси Поп ҳамда Тўрақўрғон туманлари экология бўлимлари ходимлари ҳамкорлигида туманнинг «Қазноқ» МФЙ ҳудудидан оқиб ўтувчи Сирдарё дарёси сув ҳавзасида экологик рейд тадбирини ўтказган. Тадбир давомида жами 124 дона ҳар хил турдаги, яъни «Қизил китоб»га киритилган 55 та «Туркистон мўйловдори» ва бошқа турдаги балиқлар ашёвий далил сифатида олиниб, тегишли тартибда баённома расмийлаштирилган. Шу билан бирга Сирдарёда «Қизил китоб»га киритилган лочинларни 280 миллион сўмга сотмоқчи бўлганлар ушлангани тўғрисида хабар берилганди.