Тошкент ҳайвонот боғи ташриф буюрувчилар учун яна очилди
Ҳаво ҳарорати аста-секин кўтарилиб, қорлар эрий бошлагани сабаб Тошкент ҳайвонот боғи одатдагидек иш фаолиятига қайтди. Ташриф буюрувчиларга қулайлик яратиш учун 2 та кириш йўли очиқ — янги ва бепул катта автотураргоҳ билан
Ҳаво ҳарорати аста-секин кўтарилиб, қорлар эрий бошлагани сабаб Тошкент ҳайвонот боғи одатдагидек иш фаолиятига қайтди. Бу ҳақда ҳайвонот боғи маъмурияти хабар берди.
«Ўтган шу кунларда биз тиним билмай меҳнат қилиб, жона-жон ҳудудимизни синган дарахт шохларидан тозаладик. Эндиликда ҳамма ерлар тозаланиб, сизга ҳеч қандай хавф-хатар солмайди, биз эса ‘Меҳмонимиз бўлинг, азиз дўстлар’ дейишдан хурсандмиз.
Ва шуни ҳам таъкидлаб ўтишни истардикки, сизга қулайлик яратиш учун 2 та кириш йўли очиқ — янги ва бепул катта автотураргоҳ билан», дейилади хабарда.
Аввалроқ Ўзбекистонга Россия Европа қисми шимолий ҳудудларида шаклланган совуқ ҳаво массаси кириб келиши натижасида айрим ҳудудларда ҳаво ҳарорати 27 даражагача совиб кетиши ҳақида хабар берилганди. Шундан сўнг Соғлиқни сақлаш вазирлиги ушбу совуқдан химояланиш бўйича, «Юксалиш» умуммиллий ҳаракати эса аномал совуққа тайёргарлик кўриш бўйича тавсиялар берди.
Мавзуга доир: Тошкент ҳайвонот боғига пантералар олиб келинди — видео
Эслатиб ўтамиз, олдинроқ Тошкент аэропортидан ҳайвонот боғига жўнатилган тимсоҳча ва 6 бош буқаламун нобуд бўлгани, Сурхондарёда Қизил китобга киритилган 4 бош Бухоро буғуси ҳайвонот боғига топширилгани, Тошкент ҳайвонот боғидаги жирафанинг ўлимига нима сабаб бўлгани маълум қилингани тўғрисида хабар берилганди.
