Энергетика вазирлиги «Газпром» билан имзоланган шартнома шартлари ҳақида маълумот берди. Имзоланган «Йўл харита»сига мувофиқ томонлар ўртасида тузилган ишчи гуруҳ Қозоғистон ва Ўзбекистон ҳудудидан ўтувчи «Ўрта Осиё – Марказ» газ қувури орқали газ транзитини амалга ошириш учун зарур бўладиган техник чора-тадбирларни ва ўрганишни келишиб олинган.

Шунингдек, маълум қилинишича, шартномада Ўзбекистоннинг мавжуд газ транспорти тизимига эгалик ҳуқуқини тўлиқ сақлаган ҳолда ички бозорга табиий газ зарур миқдорларда етказиб бериш мақсад қилинган.

«Бунда газ транспорт тизими кимгадир берилиши ёки суверенитетга қандайдир таҳдид умуман йўқ. Келгусида ушбу йўналишдаги барча ишлар Ўзбекистоннинг миллий манфаатларини тўлиқ ҳимоя қилган ҳолда амалга оширилиб, натижалари юзасидан доимий равишда жамоатчиликка маълум қилиб борилади», — дейилади Энергетика вазирлиги хабарида.

Маълум қилинишича, ишчи гуруҳ техник жиҳатдан барча ишларни якунлагандан сўнг, табиий газни етказиб бериш бўйича асосий шартларни муҳокама қилади.

Аввалроқ Ўзбекистон Энергетика вазирлиги ва «Газпром» ўртасида газ соҳасида ўзаро ҳамкорлик қилиш бўйича «йўл харитаси»нинг имзолангани ҳақида хабар берилганди, «Юксалиш» ҳаракати расмийларни имзоланган «йўл харитаси» мазмунини очиқлашга чақирганди.