Наманган ва Самарқанд вилоятларида корхона раҳбарлари имтиёзли кредит маблағларини ўзлаштирганликда гумонланмоқда. Бош прокуратура ҳузуридаги департаментнинг ҳудудлардаги бўлимлари томонидан текширувлар ўтказилганида Наманган вилоятининг Норин туманида корхона раҳбари аттракцион жиҳозларини олиш учун тижорат банки филиалидан имтиёзли кредит ажратилгани аниқланган. Бироқ тадбиркор бунинг эвазига 228,8 минг долларлик жиҳозларини сотиб олмасдан, кредит маблағини хориж компанияси орқали нақдлаштириб, ўзлаштирган.

Бундан ташқари Самарқанд вилоятининг Ургут туманида иссиқхона қуриш учун тижорат банки филиалидан ажратилган имтиёзли кредит эвазига харид қилинган 416 миллион сўмлик металл буюмларини нақд пулга сотиб, кредит маблағини ўзлаштириш йўли билан талон-торож қилган.

Эслатиб ўтамиз, аввалроқ Самарқанд ва Тошкент вилоятларида имтиёзли кредит маблағларини ўзлаштириш ҳолатлари аниқланганди. Шунингдек, Навоийда 156 миллион сўм имтиёзли кредит маблағларини ўзлаштирган иш юритувчи аниқланган. Ўзбекистоннинг уч вилоятида қарийб 2,5 миллиард сўмлик имтиёзли кредитлар талон-торож қилинганларга жиноят иши қўзғатилган эди.