Владимир Путиннинг матбуот котиби Дмитрий Песков CNN телеканалининг Россия ҳукумати яна 200 минг кишини сафарбарликка жалб этмоқчилиги тўғрисидаги хабарлари нотўғри эканини маълум қилди. «ТАСС» давлат ахборот агентлиги мухбирлари Дмитрий Песковдан CNN материали «ижтимоий тармоқлардаги аввалги миш-мишлар каби ишончсизми?», деб сўраган, Песков «Ҳа, шундай», деб жавоб берган.

CNN телеканали 24 январь куни Россия президенти Владимир Путин сафарбарликнинг янги тўлқинини ўтказиш ва армияга яна 200 минг кишини чақириш масаласини кўриб чиқаётганини маълум қилганди. Телеканалга бу ҳақда разведка маълумотлари билан таниш Америка ва Ғарб амалдорлари хабар берган. Манбаларнинг тахминича, сафарбарликнинг янги тўлқини «нисбатан тинч ўтади». Ғарб разведкасининг юқори мартабали амалдорига кўра, Путин бу борада якуний қарор қабул қилмаган, бунга унинг «жамоатчилик норозилиги ва салбий иқтисодий оқибатлардан хавотирда» экани сабаб қилиб кўрсатилган.

Маълумот учун, Россия президенти Владимир Путин 21 сентябрь куни мамлакатда қисман ҳарбий сафарбарлик эълон қилган эди. Сергей Шойгу сафарбарликка асосан кимлар чақирилишига ойдинлик киритганди. Сафарбарлик эълон қилиниши фонида мамлакатни оммавий тарк этишлар ортиб кетган ва бунинг оқибатида қатор шаҳарларга авиарейслар учун чипталар тугаб қолганди.

Россия фонд бозори кескин қулаган. Россия чегараларида давлатдан чиқиб кетаётган фуқароларнинг узун тирбандликлари юзага келганди. Қисқа вақтда мамлакатни 260 минг эркак тарк этганди. Forbes эса Россияни сафарбарлик бошланганидан бери 600-700 минг киши тарк этгани ҳақида ёзганди.