Россияда Тожикистон фуқаросидан «паспортини қайтариб бериши»ни талаб қилган икки ўзбекистонлик уни калтаклаб, катта миқдордаги пулларини тортиб олди, деб хабар бермоқда «Фонтанка». Ўғриликда гумон қилинган шахсларнинг ҳибсга олиниши ҳақидаги хабарни Ички ишлар вазирлигининг Санкт-Петербург ва Ленинград вилояти бўйича бош бошқармаси 20 январь куни маълум қилган. Жиноят иши 28 ёшли Тожикистон фуқаросининг аризасига кўра қўзғатилган.

Жабрланувчининг айтишича, Ўзбекистон фуқароси бўлган 20 ёшли таниши ой бошида унинг Горная кўчасидаги уйига ўзининг ва яна бир эркакнинг паспортини қайтариб бериш талаби билан келган, шунингдек, у уч нафар шериги билан бирга бўлган. Расман ишсиз ҳисобланган 28 ёшли жабрланувчи ҳаворанг Киа автомобилига ўтқазилиб, Петербургга олиб келинган ва «Ломоносов» метро станциясида қолдириб кетилган. Аризачининг айтишича, «сафар» давомида уни калтаклаб, 630 минг рублдан (9,1 минг доллар) ортиқ пулини тортиб олишган.

Жабрланувчи ҳуқуқ-тартибот идораларида мазкур воқеадан икки ҳафта ўтиб мурожаат қилган. Гумоналнувчилар қўлга олинган. 17 январь куни 20 ёшли Ўзбекистон фуқароси «Ладожская» метро бекатида ушланган. Бир кун ўтиб эса жиноят қидирув бўлими ходимлари 25 ёшли Ўзбекистон фуқароси ҳамда унинг ўзидан беш ёш кичик бўлган ҳамюртини ҳам қўлга олган. Улардан бирининг уйидан Киа Рио автомобили топилган. Ҳужумнинг тўртинчи иштирокчиси ҳозирда қидирувда.

Аввалроқ Россияда ўзбекистонлик мигрантлар ноқонуний курьерлик ортидан қамалаётгани, Қозоғистонда гиёҳванд моддаларни сотиш ва сақлашда гумонланган ўзбекистонлик ушлангани, Тула вилояти Алексин шаҳрида ўзбекистонлик эркак танишининг қулоғини кесиб олгани тўғрисида хабар берилганди.