Тошкент шаҳрида 2022 йилнинг 12 ойи мобайнида 1,2 мингта йўл-транспорт ҳодисаси содир бўлган. Бу ҳақда пойтахт ИИББ ахборот хизмати хабар берди.

Ҳисобот даврида ЙТҲ оқибатида ҳалок бўлганлар сони 136 нафарни ташкил этган, 1463 нафари тан жароҳати олган. Йўл-транспорт ҳодисаларининг 32,5 фоизини пиёдалар иштирокидаги бахтсиз ҳодисалар ташкил этади. Болалар иштирокида 169 та йўл-транспорт ҳодисаси содир бўлган, бунинг оқибатида 56 нафар вояга етмаган бола тан жароҳати олган, 17 нафари вафот этган.

Энг кўп учрайдиган қоидабузарлик тезликни ошириш бўлган — 370 та ҳолат. 143 нафар ҳайдовчи светофорнинг тақиқловчи ишорасига ўтган. 8 та бахтсиз ҳодиса автомобиль рулида ўтирган шахсларнинг маст ҳолатда бўлганлиги сабабли содир бўлган, 73 та ЙТҲ жиддий оқибатларга олиб келган.

Маълумот учун, Bugun.uz нашрида 2022 йилнинг октябрь ойида чоп этилган хабарларда жами 11 киши ЙТҲ оқибатида ҳалок бўлгани келтирилган. Хусусан, Жиззах вилоятида 32 ёшли ИИБ ходими назорат-текширув постига тунги хизматга кетаётганида ЙТҲга учраб, вафот этган, Самарқандда Lacetti ЙТҲга учраши оқибатида беш киши Қашқадарёда эса бир йўловчи ҳалок бўлган. Шунингдек, Фарғона вилоятининг ўзида юз берган авариялар жами тўрт киши ҳалок бўлганди.

Аввалроқ Тошкентда ЙТҲда ҳалок бўлган йигитнинг онаси терговчиларни қотилни яширишда айблагани, Андижонда ўнга яқин автомобиль иштирокида ЙТҲ содир бўлгани, Наманганда Malibu ва «Жигули» иштирокидаги ЙТҲда ҳайдовчилардан бири ҳалок бўлгани тўғрисида хабар берилганди.