Абдумавлон Қосимов Тошкент шаҳар депутати лавозимидан озод қилинди
«Газета.uz» Халқ депутатлари Тошкент шаҳар кенгаши депутати Абдумавлон Қосимов ўз аризасига биноан муддатидан олдин истеъфога чиқарилгани ҳақида хабар берди. Халқ депутатлари Тошкент шаҳар кенгаши депутат Абдумавлон Қосимовнинг муддатидан олдин истеъфога чиқишини маъқуллаган, кенгашнинг 27 январь куни бўлиб ўтган 77-сессиясида қарор қабул қилинган. Депутатнинг ўзи истеъфога чиқиш ҳақида ариза берган. Депутат кенгаш котибияти мудири лавозимида ҳамда ижтимоий тармоқлар ва кенгаш сайтини назорат қилиб борган.
Маълумот учун, Абдумавлон Қосимов 2020 йил январь ойида «Адолат» партиясидан 45-Қоратош округи депутати этиб сайланган, депутатлик ваколати 2025 йилнинг январигача амал қилиши керак эди. Абдумавлон Қосимов тадбиркор, у тўқимачилик ва мўйнали маҳсулотларни ювиш ва кимёвий тозалаш каби тадбиркорлик фаолиятлари билан шуғулланган.
Абдумавлон Қосимов Шавкат Мирзиёев томонидан «қиш мавсумига лозим даражада тайёргарлик кўрмагани» сабаб ишдан олинган пойтахт ҳокими (ва депутатлар кенгаши раиси) Жаҳонгир Ортиқхўжаевга 17 январь куни кенгашнинг Telegram-каналида миннатдорчилик билдирилган пост жойлангани билан боғлиқ вазиятда «танилган». Кейинроқ эса ушбу хабар ўчириб ташланади ва кенгаш раиси ўринбосари Тошпўлат Матибоев ҳокимият вакиллик органи собиқ ҳокимга мурожаат эълон қилмагани ҳамда бу мурожаатни қўллаб-қувватламаслигини маълум қилган. Шундан сўнг, Telegram-каналдаги барча хабарлар ўчирилиб юборилган, Instagram ва Facebook’даги саҳифалар ҳам «йўқ қилинган».
Тошкент шаҳар собиқ ҳокими Жаҳонгир Ортиқхўжаевнинг шаҳар кенгаши депутатлик ваколати муддатидан олдин тўхтатилгани ҳақида хабар берилганди. Тегишли қарор 27 январь куни шаҳар кенгаши томонидан қабул қилинган. Жаҳонгир Ортиқхўжаев 2020 йил январь ойида 48-сайлов округидан ЎзЛиДеП партиясидан дастлаб Кенгаш депутати, сўнгра беш йиллик муддатга сенатор этиб сайланган эди.
Аввалроқ Шавкат Мирзиёев 16 январь куни бўлиб ўтган йиғилишда ҳокимнинг истеъфога чиқишини маълум қилган эди. «Қиш мавсумига лозим тайёргарлик қилмагани учун Тошкент шаҳри ҳокими Ортиқхўжаевни кечаси штабда ишдан олдим. Қуруқ гап билан, ёлғон ‘сводка’ билан пастга тушмагани учун, ноинсоф, оёғи ердан узилгани учун уни ишдан олдим», — деган давлат раҳбари. Шунингдек, Президент Давлат хавфсизлик хизмати ва Бош прокуратурага бугун лавозимидан озод этилган мутасаддиларнинг фаолиятини ўрганиш ва қонун бузилишлари аниқланган тақдирда, қатъий жавобгарликка тортишни топширган.
