Катталиги автобусдек келадиган 2023 BU астероид 27 январь куни соат 05:27 да Жанубий Американинг жанубий қисми устидан учиб ўтди, деб хабар беради NASA. Астероиднинг Ерга яқинлашиш траекторияси 3,6 минг километрни ташкил этган — бу кўплаб сунъий йўлдошлар орбитасидан ҳам яқин дегани.

Ушбу астероид ўтган дам олиш кунлари аниқланган эди — уни Қримда яшовчи ҳаваскор астроном Геннадий Борисов пайқаб қолган. Шундан кейин олим 2023 BU нинг ўлчами ва орбитасини ҳисоблаб чиққан.

«Агарда 2023 BU Ер билан тўғрисидан тўғри тўқнашиш йўналиши бўйича ҳаракатланганда ҳам у катта зарар келтирмас эди», — дейди олимлар.

Ўлчами 3,5—8,5 метр оралиғида бўлган осмон жисми атмосферанинг юқори қисмида ёниб кетган ва Ер аҳолиси бунга гувоҳ бўлган бўлади. Таққослаш учун, машҳур Челябинск метеоритини диаметри 20 метрни ташкил этган. Унинг ерга қулашидан ҳосил бўлган зарба тўлқини атрофидаги бинолар деразаларига шикаст етказган.

Аввалроқ Ерга 2022 йил 1 ноябрь куни Дубайдаги Бурж Халифа осмонўпар биноси катталигидаги астероид яқинлашганди. 2022 RM4 деб номланган космик объектнинг диаметри тахминан 740 метрга тенг эди. NASA мутахассислари уни катталиги ва сайёра ёнидан мунтазам парвозлари туфайли «потенциал хавфли астероид» деб таснифлаган.