Ўзбекистонда чиқиндилар газидан электр энергияси ишлаб чиқарадиган мажмуани қуриш бошланди
Чиқинди газларидан электр токи ишлаб чиқариш лойиҳаси Жанубий Кореянинг Sejin G&E компанияси томонидан амалга оширилмоқда
Табиий ресурслар вазирлиги Тошкент вилоятидаги «Оҳангарон» ва «Майдонтол» полигонларида ҳосил бўладиган газдан электр энергияси ишлаб чиқариш мажмуаси қурилиши бошлангани ҳақида хабар берди. Мажмуанинг пойдеворини қўйиш маросимида Жанубий Кореянинг атроф-муҳитни муҳофаза қилиш вазири ўринбосари Ю Чечул бошчилигидаги делегацияси, шунингдек, Ўзбекистон табиий ресурслар вазири ўринбосари Нарзулла Обламурадов, энергетика вазирининг биринчи ўринбосари Азим Аҳмаджонов ҳамда лойиҳани амалга оширувчи Sejin G&E компанияси раҳбари Ли Кюнг Ёнг иштирок этган.
Лойиҳа Ўзбекистон ва Марказий Осиё минтақасидаги йирик маиший чиқинди полигонларида ҳосил бўладиган чиқинди газини қайта ишлаш ҳисобига электр энергияси ишлаб чиқаридиган ягона станцияга айланади. Мажмуа ишга тушганидан сўнг камида 16 мегаватт бўлган электр энергияси ишлаб чиқарилади. Sejin G&E лойиҳага 55 миллион доллар миқдоридаги тўғридан-тўғри инвестиция маблағларини йўналтиради.
Аввалроқ табиат ресурслари вазири Азиз Абдуҳакимов ва Жанубий Корея атроф-муҳит вазири ўринбосари Ю Чечул бошчилигидаги делегация ўртасида учрашув бўлиб ўтгани тўғрисида хабар берилганди. Учрашув якунида Табиат ресурслари вазирлиги ва Жанубий Корея Атроф-муҳит вазирлиги ўртасида ўзаро англашув баёноти имзоланган.
Аввалроқ 2018 йилда Sejin G&E томонидан Тошкент вилоятидаги иккита полигонда умумий қуввати камида 16 МВт — 10 дона 1560 кВт ва 2 дона 500 кВт бўлган полигон газидан электр энергияси ишлаб чиқариш учун 12 та генератор ва ёрдамчи ускуналар ўрнатилиши маълум бўлганди.
