Бошқаруви раиси Меҳриддин Абдуллаев бошчилигидаги «ишчи гуруҳ» аъзолари табиий газ қазиб чиқаришга амалга оширилаётган ишларни ўрганмоқда, деб хабар бермоқда «Ўзбекнефтгаз» матбуот хизмати.

2023 йилда белгиланган табиий газ қазиб чиқариш режа кўрсаткичларига эришиш учун «Ўзбекнефтгаз» томонидан 744 та геологик-техник тадбирлар ишлаб чиқилди, уларни амалга ошириш бўйича ишлар олиб борилмоқда. Устюрт бошқармасида ҳам геологик-техник тадбирлар доирасида жами 102 та иш амалга ошириш кўзда тутилган. Бошқарув раиси Меҳриддин Абдуллаев бошчилигидаги ишчи гуруҳ томонидан бошқармага ташрифнинг иккинчи кунида ушбу ишларнинг ижросининг ҳолати ҳамда жойларда меҳнат қилаётган ходимлар учун яратилган шароитлар ўрганилди.

«Арслон» конида ташкил этилган штабда қудуқларни бурғилаш ва капитал таъминлаш дастгоҳларида ишлаётган пудратчи ташкилотлар иш бошқарувчи муҳандис-техник ходимлари билан учрашув ўтказилди. Бошқарув раиси томонидан мақсадга эришиш йўлида ғов бўлаётган мавжуд муаммоли масалаларни бартараф этиш чоралари бўйича кўрсатмалар берилган. Ишчи гуруҳ томонидан мавжуд 19 та бурғилаш дастгоҳлари билан қудуқларни бурғилаш режа-жадваллари кўриб чиқилди. Биринчи навбатда, газ қазиб чиқариш кўрсаткичлари юқори бўлган қудуқларни ишга туширишни тезлаштириш мақсадида бурғилаш режа-жадваллари қайта тасдиқланди.

Ташриф доирасида «Арслон» комплекси қувватини ошириш мақсадида, қурилаётган 3-технологик тармоқдаги ишлар назорат қилинди. Бу ерда масъулларга ушбу технологик тармоқни қурилиш-монтаж ишларини жадаллаштириш бўйича зарур бўлган моддий техник ресурсларни харид қилиш ва етказиб бериш ишларини жадаллаштиришга доир топшириқлар берилди.

Қишнинг совуқ кунларида Комплексда фаолият олиб бораётган ишчи-ходимларнинг иш ва яшаш шароитлари кўздан кечирилиб, зарур шарт-шароитларни яхшилаш бўйича масъулларга вазифалар берилди.

Табиий газ қазиб чиқаришни ошириш мақсадида «Қуйи Сургил» конига қарашли 24, 25, 26 сонли, «Шимолий Бердақ» конидаги 114, 117 сонли ишлатиш қудуқларида бурғилаш ишлари амалга оширилмоқда. Бу ерда бурғилаш ташкилотлари ва Устюрт газ қазиб чиқариш бошқармаси раҳбарияти билан биргаликда мавжуд муаммоли масалалар кўриб чиқилди ва ишларни жадаллаштириш бўйича кўрсатмалар берилди.

Кунлик газ қазиб чиқариш кўрсаткичлари барқарорлигини таъминлашга қаратилган «Шимолий Бердақ» конидаги 29, 69 сонли, «Ғарбий Қуйи Сургил» конидаги 1 сонли қудуқлардаги капитал таъмирлаш ишлари ва «Қуйи Сургил» кони 15 сонли, 16 сонли қудуқларда маҳсулдор қатламда чуқурлаштириш бўйича амалга оширилаётган ишлар текширилди. Устюрт минтақасида углеводород заҳираларини ўстириш дастури доирасида «Бойлик» номли янги истиқболли майдонидаги 1  сонли ҳамда «Қуйи Сургил» конидаги 7 сонли қудуқларда олиб борилаётган бурғилаш жараёнлари билан яқиндан танишилди. «Ғарбий Қуйи Сургил» конидаги 2 та қудуқда бурғилаш ишлари ҳамда ушбу кондан «Арслон» газни комплекс тайёрлаш қурилмасигача диаметри 426 мм лик газ узатиш қувурининг қурилиш монтаж ишлари ҳам ўрганилди.

Пудратчи – «Нефтгазмонтаж» томонидан айни пайтга қадар умумий узунлиги 9,2 км бўлган қувурлар тўлиқ олиб чиқилиб, 8,6 км пайвандлаш ишлари ва 4,2 км трассада ер ишлари бажарилди. Устюрт газ қазиб чиқариш бошқармаси раҳбарияти ва тегишли департамент бошлиқлари зиммасига газ қувурини қисқа муддатда ишга тушириш учун ишчи кучларни купайтириш ҳамда газ қувури қурилиши бўйича зарур-чораларни кўриш бўйича топшириқлар юклатилди.