ИИВ Киберхавфсизлик марказининг хабар беришича, Сурхондарё вилояти Қумқўрғон туманида яшовчи ўқитувчи ИИБга ариза билан мурожаат қилиб, ўзининг банк картасидан 1 миллион 545 минг сўм пуллар номаълум шахс томонидан ечиб олинганини маълум қилиб, жиноятчига нисбатан қонуний чора кўрилишини сўраган.

Олиб борилган тезкор-қидирув тадбирлари давомида, ушбу жиноятни Қумқўрғон туманида яшовчи 1988 йилда туғилган шахс содир этгани аниқланган. Пулларни ўзлаштирган шахс жабрланувчи билан бир мактабда ишлаган. У ўз ҳамкасбининг банк картаси маълумотлари ва смс-хабарномасини қўлга киритиш орқали тўлов тизимларидан фойдаланиб, барча пулларни онлайн қимор ўйинида ютқазиб қўйган.

Ҳамкасбининг пулларини ўзлаштирган ўқитувчига нисбатан Жиноят кодексининг 169-моддаси билан жиноят иши қўзғатилиб, тергов ҳаракатлари олиб борилган.

Аввалроқ Қорақалпоғистонда шифокор 76 ёшли ҳамкасбининг пластик картасидан пул ўғирлагани ҳамда Андижонда банк ходимлари 111 млн сўмни қимор ўйинларига сарфлаб юборгани ҳақида хабар берилганди.