Статкўмита Ўзбекистонда 2022 йилда ялпи ички маҳсулот (ЯИМ) ҳажми жорий нархларда 888,34 триллион сўмга етгани ҳақида хабар берди. 2021 йил даражасига нисбатан реал ўсиш суръати 5,7 фоизни ташкил этган. ЯИМда саноат маҳсулотларининг улуши 484,7 триллион сўмга (+5,2 фоиз), хизматлар кўрсатиш — 343,3 триллион сўмга (+8,5 фоиз), маҳсулотларга соф солиқлар — 60,3 триллион сўмгача ошган. Ўзбекистон ЯИМ ҳажмини АҚШ долларининг ўртача курс бўйича ҳисобланганда номинал ЯИМ 80,38 миллиард долларни ташкил этган, бу 2021 йилга нисбатан 11,18 миллиард долларга кўп.

Савдо, турар жой ва озиқ-овқат хизматлари соҳаси 9,3 фоизга, транспорт, ахборотлаштириш ва алоқа соҳаси 14,7 фоизга ўсган. Қишлоқ, ўрмон ва балиқ хўжалигида (3,6 фоиз) нисбатан паст ўсиш суръатлари кузатилган. Аҳоли жон бошига ЯИМ реал кўринишда 3,5 фоизга — 21,15 миллион сўмдан 24,91 миллион сўмга (2254,9 доллар) ўсди. Таққослаш учун, 2021 йилда 5,3 фоизга, 2020 йилда пандемия йилида эса 0,1 фоизга ўсиш қайд этилган. Прогнозларга кўра, Ўзбекистонда 2023 йилда ЯИМ 4,9 фоизга, 2024 йилда эса 5,1 фоизга ўсади.

Иқтисодий тадқиқотлар ва ислоҳотлар маркази 2022 йил учун ЯИМ прогнозларини батафсил катта маълумотлар оқимига асосланган янги ёндашув (ноукастинг) ёрдамида ҳисоблаб чиққанди. Шундан келиб чиқиб, 2022 йил учун Ўзбекистоннинг иқтисодий ўсиши прогноз қилинаётган диапазони 5,67-5,87 фоиз даражасида белгиланган эди.