Ўзбекистонда 2022 йилда ўртача иш ҳақи 21,1 фоизга ошиб 3,9 миллион сўмни ташкил этди, деб хабар бермоқда Статқўм. Ҳудудлар кесимида 2022 йилда ўртача ойлик номинал ҳисобланган иш ҳақининг энг юқори кўрсаткичлари Тошкент шаҳрида (6,3 миллион сўм), Навоий вилоятида (5,1 миллион сўм), Тошкент вилоятида (3,9 миллион сўм), Андижон вилоятида (3,38 миллион сўм) ҳамда Бухоро вилоятида (3,32 миллион сўм) кузатилган. Энг паст кўрсаткич Фарғона (2,9 миллион сўм) вилоятида қайд этилди.

Республика бўйича 2022 йилда энг юқори ойлик маош тўланадиган фаолият турларига банк, суғурта, лизинг, кредит ва воситачилик соҳалари киритилган. Ушбу соҳада ишлайдиган ходимларнинг ўртача ойлик иш ҳақи 10,8 миллион сўмни ташкил этган. Ушбу соҳада ўртача ойлик иш ҳақининг энг юқори кўрсаткичи Тошкент шаҳри (14,2 миллион сўм), Андижон (9,7 миллион сўм), Хоразм (9 миллион сўм) ва Бухоро (8,8 миллион сўм) вилоятларида кузатилган.

Ойлик маош энг паст тўланадиган деб таълим (2,7 миллион сўм) ҳамда соғлиқни сақлаш ва ижтимоий хизматлар (2,6 миллион сўм) соҳаларида қайд этилган. Таълим соҳасининг асосий тармоқлари бўйича ўртача ойлик иш ҳақининг энг юқори кўрсаткичи олий таълимда (6,1 миллион сўм), энг паст кўрсаткич эса мактабгача таълимда (1,5 миллион сўм) кузатилди.