Россиядан қўшни давлатларга пул ўтказмалари кескин ошди
Россиядан Қозоғистон, Грузия, Ўзбекистон, Арманистон ва Қирғизистонга пул ўтказмалари ҳажми 2022 йилда рекорд даражада кўпайган. «РБК»нинг маълум қилишича, Россиядан қўшни давлатларга пул ўтказмалари бўйича Ўзбекистон биринчи ўринни эгаллаган. 2022 йилда Россиядан Ўзбекистонга пул ўтказмалари ҳажми 14,5 миллиард долларни ташкил этди. Ўзбекистон Марказий банки эълон қилган маълумотларда кўра, 2022 йилда хориждан 16,9 миллиард долларлик пул ўтказмалари амалга оширилгани ҳақида маълум қилинган. Бу кўрсаткич 2021 йилга нисбатан 2,1 баробарга ўсган.
Қозоғистон Миллий банки эълон қилган маълумотларга кўра, 2022 йилда Россиядан Қозоғистонга қарийб 775,4 миллион доллар жўнатилган. Бу 2021 йилда ушбу мамлакатга юборилган пул ўтказмалари ҳажмидан 6,8 баробар кўпдир. Шунингдек, 2022 йилда Россиядан Грузияга тахминан 2 миллиард доллар жўнатилган. Қайд этилишича, бу кўрсаткич 2022 йилдан олдинги йилларга қараганда беш бараварга ошган.
Мутахассисларнинг фикрича, пул ўтказмалари ўсишининг асосий сабабларидан бири Украинадаги ҳарбий ҳаракатлар ҳамда Россияда сафарбарлик эълон қилиниши бўлган. Шунингдек, санкциялар туфайли Россияда мавжуд бўлмаган айрим товарларни хорижда сотиб олиш хизматининг оммалашиб бораётгани ҳам пул ўтказмаларининг ошишига сабаб бўлаётгани маълум қилинган.
Халқаро пул ўтказмаларининг кескин ўсишига Россия рублининг долларга нисбатан сезиларли даражада мустаҳкамлангани, шунингдек, Россияда валютага нисбатан чекловлар жорий этилиши ҳам ўз таъсирини ўтказган.
