Туркиянинг Шанлиурфа шаҳри 2023 йилда Ислом оламининг туризм шаҳри деб эълон қилинди
Туркиянинг Шанлиурфа шаҳри «Ислом ҳамкорлик ташкилоти» томонидан «2023 йил туризм шаҳри» деб эълон қилинди. «Ислом ҳамкорлик ташкилоти» томонидан берилган ушбу эътирофни нишонлаш мақсадида Шанлиурфа бир қанча тадбирларга мезбонлик қилади, жумладан, Халқаро Ҳалол кўргазмаси, Ислом олами олимлари симпозиуми ва Ислом дунёсини бирлаштирган саёҳат китоблари симпозиуми ўтказилади.
Туркиянинг жануби-шарқида жойлашган Шанлиурфа очиқ осмон остидаги музей ҳисобланиб, тарихий, диний ва археологик кашфиётлар макони саналади. Шаҳар 12 минг йиллик тарихга эга. Турли динлар, маданиятлар ва цивилизацияларнинг изларини ўзида мужассам этган «биринчи ва энг қадий».
Маълумот учун, UNESCO’нинг жаҳон мероси рўйхатига киритилган Гўбеклитепе, неолит даврига оид «Тош тепалар» ҳудуди, бундан ташқари тарихий «Ҳарран» гумбазли уйлари, Ҳалфети сокин шаҳри, Баликлигўл (Балиқли кўл) ва Айн Зелиҳа (Зелиҳанинг кўзи) каби диққатга сазовор жойлари Шанлиурфада жойлашган.
Тарихий Шанлиурфада Туркиянинг энг катта музей мажмуаси жойлашган. У ерда эса дунёдаги энг йирик неолит коллекцияси — Ахиллей ва Амазонлар ҳаётини акс эттирувчи ажойиб Рим вилласи мозаикаси жойлашган. Шанлиурфа Баликлигўл бозорлари, диний ва маданий мажмуа сифатида ҳам эътиборни тортади.
Афсонага кўра, Иброҳим пайғамбар шоҳ Намруд ва унинг бутпарастлари билан қаттиқ курашда Намруд томонидан оловга ташланган. Бироқ, Иброҳим пайғамбар оловга тушганда, аланга ўрнида тиниқ кўл пайдо бўлган ва ёнаётган ўтин балиққа айланган. Баликлигўл айнан ўша кўл эканлигига ишонилади. Иброҳимга ишонган ва шоҳ Намруднинг қизи бўлган Зелиҳа ҳам ўзини оловга ташлайди ва Айн Зелиҳа (Зелиҳанинг Кўзи) у йиқилган Баликлигўлнинг ёнида ҳосил бўлади.
Бундан ташқари, Ҳалфети шаҳри гўзал манзаралари ва рўйхатга олинган қора атиргулнинг ватани сифатида сайёҳларнинг эътиборини ўзига тортади. Маълумот учун, қора атиргул ноёб ранги ва ҳидини тупроқдан олади. Шанлиурфанинг унумдор Ҳарран текислигида гумбазли уйлар, дунёдаги биринчи университет ва Онадўлидаги энг қадимги масжидлардан бири жойлашган. Ҳарран масжиди (744–750) ислом меъморчилигининг бир қисми сифатида Онадўлида қурилган энг қадимги масжиддир.
