АҚШ ҳукумати Европада Қуръонни ёқиш билан содир бўлган воқеалардан кейин ўз фуқароларини Истанбулдаги черковлар, синагогалар, дипломатик миссиялар ва ғарб давлатлари фуқаролари ташриф буюрадиган бошқа жойларда террорчилик ҳужумлари уюштирилиши мумкинлигидан огоҳлантирди. Бу ҳақда мамлакатнинг Анқарадаги элчихонаси хабарида келтирилган.

Огоҳлантириш айниқса, Истанбулнинг Беёғлу, Галати, Таксим ва Истиқлол туманларига тааллуқли. Улар фуқароларни огоҳ бўлишга, одамлар тўпланадиган жойлардан қочишга ва эътироб тортмасликка чақиради.

«Террорчилар Ғарб аҳолиси тез-тез ташриф буюрадиган диний муассаса ёки жойларга огоҳлантиришсиз ҳужум уюштириши мумкин», — дейилади хабарда.

Аввалроқ Туркия Финляндия ва Швециянинг НАТОга аъзо бўлиш ҳақидаги аризасини кўриб чиқиш жараёни бошланишига тўсқинлик қилганди. Бунгача Президент Ражаб Тоййиб Эрдўғон икки мамлакатнинг ҳарбий блокка қўшилишини қўллаб-қувватлай олмаслигини, чунки бу ҳолда ташкилот «террорчилар ўчоғига» айланишини айтганди. Бундан ташқари, Туркия президенти Стокгольм ва Хельсинкидан Курдистон ишчилар партиясининг 33 нафар вакилини экстрадиция қилишни талаб қилгани, аммо рад жавобини олганини айтган. Туркия НАТОга ультиматум қўйган.

Қуръони Каримни ёқиб юборган швед сиёсатчиси Рамус Паладун туфайли Швециянинг Туркия билан ўзаро муносабатлари кескин ёмонлашган. Хусусан, Швеция мудофаа вазири Пол Жонсоннинг Туркияга ташрифи ҳам бекор қилинди. Ташриф давомида Туркия Швециянинг НАТОга аъзолик миссиясини қўллаб-қувватлашини ва шу каби бошқа музокараларни ўтказиши режалаштирилганди. Ташриф бекор бўлгани сабаб Швециянинг НАТОга аъзолик миссияси ҳам сўроқ остида қолмоқда.

Расмус Палудан 28 январь куни Копенгагендаги масжид олдида ҳам муқаддас китобни ёқиб юборди. Маълумотларга кўра, Палуданнинг акцияси жума намозидан кейин маҳаллий масжид қаршисида содир бўлган. Ҳимоя каскасини кийиб олган сиёсатчи полиция ҳимоясида бўлган. Стокгольмда бўлгани каби Копенгагенда ҳам ушбу акция маҳаллий ҳукумат билан келишилган.