Истиқболли лойиҳалар миллий агентлиги Марказий банк крипто-активлар инвестициясига нисбатан салбий муносабатда эканини айтган банк раиси Мамаризо Нурмуродовга раддия берди.

Эслатиб ўтамиз, 26 январь куни Марказий банк биносида банкибошқаруви раиси Мамаризо Нурмуродов иштирокида матбуот анжумани бўлиб ўтганди. Унда Марказий банк раиси крипто-активлар масаласига бутун дунё каби жуда консерватив ёндашишини айган. «Биз криптовалютани қиммат актив деб ҳисобламаймиз ва унга муносабатимиз салбий», — деган у.

Истиқболли лойиҳалар миллий агентлиги Мамаризо Нурмуродов томонидан тақдим этилган маълумотларнинг эскиргани ҳамда ҳақиқатга тўғри келмаслигини маълум қилди.

Хусусан, Ўзбекистон Президентининг «Ўзбекистон Республикаси Истиқболли лойиҳалар миллий агентлиги фаолиятини ташкил этиш тўғрисида»ги қарорига мувофиқ, агентлик крипто-активлар айланмаси соҳасини ривожлантириш ҳамда ушбу соҳада фаолиятни лицензиялаш ва рухсат бериш тартиб-таомиллари бўйича ваколатли орган ҳисобланади.

«Яъни Марказий банк крипто-активлар айланмаси соҳасидаги ваколатли орган ҳисобланмайди, шу сабабли унинг вакиллари Марказий банк томонидан тартибга солинмаган соҳага оид баёнотлар беришга ҳақли эмас», — дейилади раддияда.

Қайд этилишича, Марказий банк раҳбари ўз нутқида маҳаллий аҳолининг крипто-активларни сотиб олишда бевосита иштирок эта олмаслиги ҳақида гапирганида эскирган ва ишончсиз маълумотларни келтирган. Хусусан, Лойиҳа бошқаруви миллий агентлиги директорининг 2019 йил 6 декабрдаги 172-сон буйруғи билан крипто-биржаларни лицензиялаш тартиби тўғрисидаги низомга тегишли ўзгартиришлар киритилиб, крипто-биржаларда савдони амалга ошириш қоидалари тасдиқланган. Мазкур қоидаларда Ўзбекистон резидентлари крипто-биржаларда фақат крипто-активлар ва токенларни сотиш бўйича операцияларни амалга ошириш ҳуқуқига эгалиги назарда тутилган.

Шунингдек, Лойиҳа бошқаруви миллий агентлиги директорининг 2021 йил 11 ноябрдаги 34-сон буйруғи билан Крипто-биржаларда савдони амалга ошириш қоидаларига ўзгартиришлар киритилиб, унда Ўзбекистон резидентларига крипто-биржаларда крипто-активлар ва миллий валютадаги токенлар билан крипто-биржа савдоларининг барча турларини амалга ошириш ҳуқуқи, ҳамда Ўзбекистон резидентлари бўлмаган шахслар билан фақат крипто-активлар ва чет эл валютасига токенларни сотиш бўйича операциялар ҳуқуқи тақдим этилган.

Кейинчалик юқоридаги қоидалар ўз кучини йўқотган деб топилган ва унинг ўрнига Крипто-биржада крипто-активлар савдосини амалга ошириш қоидалари қабул қилинган, мазкур қоидаларнинг 5-бандига кўра Ўзбекистон резидентлари крипто-биржалар электрон платформаларда миллий валютада крипто-активлар савдосининг барча турларини, шу жумладан, тўғридан-тўғри савдо қилиш майдончасида крипто-активларни сотиш ва сотиб олиш бўйича операцияларни амалга ошириш, Ўзбекистоннинг резидентлари бўлмаган шахслар билан фақат крипто-активларни чет эл валютасига сотиш бўйича операцияларни амалга ошириш ҳуқуқига эга.

«Истиқболли лойиҳалар миллий агентлиги юқоридагиларни инобатга олиб, оммавий ахборот воситалари, шунингдек, давлат органлари вакилларига ҳақиқатга тўғри келмайдиган маълумотларни тарқатмасликни тавсия қилади. Агентлик крипто-активлар муомаласи соҳаси ўзига хос хусусиятларга эга эканлиги сабабли ҳамда нотўғри талқинларга йўл қўймаслик мақсадида Ўзбекистонда крипто-активлар айланмаси соҳасига доир маълумотлар юзасидан белгиланган тартибда бевосита агентлик билан боғланишни сўрайди», — дея таъкидланади хабарда.

Аввалроқ Ўзбекистонда крипто-дўкон фаолиятини ташкил этиш тартиби белгилангани, мамлакатда крипто-биржаларнинг блокланганига изоҳ берилгани, жисмоний шахсларга криптовалюта майнинги тақиқлангани тўғрисида хабар берилганди. Шунингдек, Ўзбекистонда криптоактивлар айланмаси соҳасида тартибга солиш махсус режими жорий этилган.