Қорақалпоғистоннинг Нукус шаҳридаги кўп қаватли уйларнинг бирида газ портлагани хабар қилинганди. Фақулодда вазиятлар вазирлиги ҳолат юзасида қўшимча маълумот берди. Воқеа юзасидан Тезкор штаб тузилиб, бахтсиз ходиса содир бўлган уйда қидирув-қутқарув ишлари олиб борилган. Жумладан, ушбу уйда яшовчи фуқаролар хатловдан ўтказилиб, ўпирилган том ва пол қисмлари тагида фуқаролар бор-йўқлигига аниқлик киритиш бўйича чоралар кўрилган.

Олиб борилган қидирув-қутқарув ишлари давомида вайроналар остида қолиб кетган 5 ёшли қизалоқ турли даражадаги жароҳатлар билан қутқарувчилар томонидан чиқариб олиниб, малакали тиббий ёрдам кўрсатиш учун шифохонага юборилган.

Шунингдек, бино конструкциялари орасидан қидирув-қутқарув ишлари олиб бориш жараёнида бир нафар фуқаронинг жасади топилган.

«Айни вақтда бинонинг конструкцияларини тозалаш ишлари давом этдирилмоқда. Воқеа юзасидан қўшимча маълумот тақдим этилади», — дейилади хабарда.

Бундан ташқари, мазкур уйда яшаб келаётган қолган фуқаролар эвакуация қилиниб, вактинчалик уй-жой ва уч маҳал иссиқ овқат билан таъминланган. Ҳозирда терговга қадар текширув ҳаракатлари олиб борилмоқда.

Аввалроқ Сурхондарё вилояти Термиз шаҳридаги хонадонларнинг бирида газ чақнаши оқибатида портлаш содир бўлганди. Бунинг оқибатида хонадон эгасининг бутун тана юзаси 3-4-даражали, 40-45 фоиз куйиш тан жароҳати олиб, Республика шошилинч тез тиббий ёрдам илмий маркази Термиз филиалига ётқизилган. Шунингдек, 2022 йилнинг 6 декабрь куни соат 11:30 да Фарғона шаҳридаги 41-мактаб ва 63-боғчанинг умумий иситиш козонхонаси портлаганди. Бухоро вилоятида газ портлаши оқибатида иккинчи синф ўқувчиси вафот этгани, Сурхондарёда ҳам газ баллонидан газ сизиб чиқиши оқибатида портлаш содир бўлгани хабар қилинганди.