Қозоғистоннинг Жетису вилоятида маҳаллий полиция ходимлари 38 ёшли Ўзбекистон фуқаросини калтаклаб, 200 минг тенге ҳамда олтита қўй эвазига «қуллик» учун сотиб юборди дея хабар бермоқда NewTimes.kz. Ўзбекистонлик эркак 10 йилдан бери Қозоғистонда яшайди, шахсини тасдиқловчи ҳужжатларини йўқотиб қўйган. Эркакнинг сўзларига кўра, полиция ходимлари уни сотиб, қариндошларига депортация қилинганини айтишган.

Бошқа шахсларга сотиб юборилиб, жисмоний ишларга мажбурланишига қарамасдан 38 ёшли Ўзбекистон фуқароси қочишга муваффақ бўлган. Бироқ ҳозир уни ўлдиришлари билан таҳдид қилишаётганини таъкидлаган.

«Ушбу мурожаатим Президентгача етиб бориши учун барчадан видеони кенгроқ тарқатишни илтимос қиламан. Менинг уч нафар болам бор. Менга нима иш бўлса, барчасини қилдиришди, бундай ҳаётдан чарчаб кетдим. Энди улар мени қидиришмоқда ва ўлдириш билан таҳдид қилишмоқда. Мухтарам президент мени қутқаринг!», — дейди эркак.

Маълум қилинишича, воқеа юзасидан олиб борилаётган тергов ишлари вилоят ИИБ раҳбарияти томонидан алоҳида назоратга олинган. Жетису прокуратурасининг маълум қилишича, ҳозирда ушбу факт бўйича Қозоғистон Жиноят кодексининг «ҳокимият ёки мансаб ваколатини суиистеъмол қилиш» моддаси бўйича жиноий иш қўзғатилган.