Собиқ Меҳнат вазирлиги матбуот котиби Мавжуда Мирзаева ҳам «Компромат иши» доирасида ҳибсга олингани маълум бўлди
Мавжуда Мирзаева айни пайтда ДХХ тергов ҳибсхонасида тергов қилинмоқда. Унга нисбатан 10 кунлик ҳибс бўйича суд санкцияси ҳам бор
Собиқ Бандлик ва меҳнат муносабатлари вазирлиги матбуот хизмати раҳбари Мавжуда Мирзаева «Компромат иши» доирасида ҳибсга олинган. Бу ҳақда иш тафсилотларидан хабардор манбаларига таяниб, Kun.uz нашри хабар берди.
Қайд этилишича, Мавжуда Мирзаева айни пайтда ДХХ тергов ҳибсхонасида тергов қилинмоқда. Унга нисбатан 10 кунлик ҳибс бўйича суд санкцияси ҳам бор. Мирзаева ДХХ ҳибсхонасида қолаётгани ҳақидаги маълумотни унинг қизи Зарина Мирзаева ҳам тасдиқлаган. У икки кундан буён онаси билан кўриша олмаган.
«Уйда ёлғизман, икки киши турардик. Онамнинг ҳозирги аҳволидан қаттиқ хавотирдаман. Нега бизга – яқинларига иш бўйича бирор маълумот беришмаяпти. Эшитишимча, ўн кун тергов бўлар экан», – деган у.
Эслатиб ўтамиз, 27 январь куни Human.uz сайтининг директори Хуршид Далиев, бош муҳаррири Муслим Мирзажонов ва таҳририятнинг бошқа ходимлари офисидан олиб кетилганлиги ҳақида таҳририят расмий Telegram-канали хабар эълон қилинди.Президент Администрацияси ҳузуридаги Ахборот ва оммавий коммуникациялар агентлигиҳолат юзасидан ҳуқуқни муҳофаза қилувчи органлар ва Рақамли технологиялар вазирлигига тегишли сўров юборганини маълум қилганди.
Bugun.uz’нинг бир-биридан мустақил уч манбасига таяниб, Хуршид Далиев ва Муслим Мирзажонов «бир гуруҳ шахслар томонидан ўта йирик миқдорда товламачилик содир этганлик» билан боғлиқ жиноят иши доирасида гумонланиб қўлга олингани ҳақида хабар берганди.
Кейинроқ ҳолат бўйича жиноят иши қўзғатилгани ва сайт масъулларидан ташқари давлат ташкилотларида ишловчи бошқа шахслар ҳам процессуал тартибда ушлангани айтилди. Миллий масс-медиани қўллаб-қувватлаш ва ривожлантириш жамоат фонди Human.uz интернет нашри журналистларининг қўлга олиниши билан боғлиқ вазиятдан хавотирдалигини билдирган.
Давлат хавфсизлик хизмати қўлга олинган Human.uz нашри раҳбарияти билан боғлиқ иш юзасидан қўшимча маълумот берди. Эълон қилинган маълумотларга кўра, фуқаро И.А.дан келиб тушган мурожаатга асосан, фуқаро Д.Х. (Далиев Хуршид — таҳр.) ва бошқалар Kompromatuzb Telegram-канали ҳамда бошқа каналлар орқали амалга оширилган жиноятларга алоқадорликлари сабабли қўлган олинган. Уларга нисбатан Жиноят кодексининг 165-моддаси 2-қисми «в» банди билан жиноят иши қўзғатилган. Ҳозирда дастлабки тергов ҳаракатлари олиб борилмоқда.
