АҚШ президенти Жо Байден Украинага жўнатилиши айтилган 31 та Abrams M1A2 танклари камида 2023 йил охирларида Киевга етказиб берилади. Бу ҳақда The Washington Post хабар берди.

Мақолада келтирилишича, танклар АҚШ ҳарбий захиралари ҳисобидан ажратилмайди, балки Украина хавфсизлигини таъминлаш ташаббуси доирасида харид қилинади.

«Улар Украина учун кучсизлантирилган уранли зирҳсиз ҳолатда махсус йиғилади ва жорий йил охири ёки кейинги йилда етказиб берилади», — дейилади хабарда.

АҚШ Украинага 31 та Abrams танкларини етказиб беради. Бу ҳақда мамлакат президенти Жо Байден расман маълум қилган. Байденнинг сўзларига кўра, ушбу танклар Украина Қуролли Кучларига «очиқ майдонда яхшироқ манёвр қилишига» ёрдам беради. АҚШ президенти, шунингдек, Германияга Киев учун Leopard танкларини беришга қарор қилгани учун миннатдорчилик билдирган. Унинг таъкидлашича, бу яна бир бор Украина иттифоқчиларининг бирдамлигини ҳамда Россиянинг уларни бўлиб юборишга бўлган уриниши фойдасиз эканини кўрсатган.

Шунингдек, Украинанинг Франциядаги элчиси Вадим Омельченко BFM TV телеканалига берган интервьюсида кўплаб Ғарб даавлатлари Киевга 300 дан ортиқ танк беришга рози бўлганини маълум қилганди. «Бугун кўплаб давлатлар Украинага 321 та оғир танкни етказиб беришга рози эканини расман тасдиқлади. Етказиб бериш муддатига келадиган бўлсак, ҳар бир ҳолатда алоҳида. Айрим давлатлар техник хизмат кўрсатишни амалга ошириши керак, бошқалар логистика масаласини ҳал этмоқда, яна бир қисми бошқа моделлар келишини кутяпти», — деган элчи.

Украина президенти Владимир Зеленский олдинроқ Sky News’га берган интервьюсида агарда АҚШ ваъда қилган Abrams танклари августда етиб келадиган бўлса, «бу жуда кечлигини» айтганди. Шу билан бирга Зеленский АҚШ ҳамда Европа давлатлари танклари айнан қачон етиб келиши билмаслигини таъкидлаганди.